2024 ий шыжым Йошкар-Олаште Марий калыкын XII погынжо эрташ тӱҥалеш. Марий Эл Правительстве кӱкшытыштӧ чумырымо оргкомитетын икымше заседанийже 27 сентябрьыште лийын. Тудым Марий Эл Правительстве вуйлатыше, оргкомитет вуйлатыше Юрий Зайцев вӱден. Зеданийыште оргкомитетын еҥже-влак – икмыняр министерстве ден ведомство, район ден ола администраций вуйлатыше, СМИ ден мер ушем вуйлатыше да ӱжмӧ еҥ-шамыч – лийыныт.
Мер Каҥаш вуйлатыше, оргкомитет вуйлатышын алмаштышыже Эдуард Александров Погынлан ямдылалтме паша радам дене кумдан палдарен. Погынын пашажым виктарен колташ кандаш тӱрлӧ пашаче группым ыштыман. Тудым эртарен колтымо шотышто программым ямдылымашке Мер Каҥаш ден оргкомитетын еҥыштым, тыгак специалист-шамычым ушаш лийме. Делегат-влакым Марий Элысе районла ден олала, тыгак Российыште марий-влакын тӱшкан илыме кундемла гыч 1100 марий деч 1 делегатым сайлаш палемдыме. Тыге Марий Эл ӱжмӧ уна-влак дене пырля Погыныш чылаже 500 еҥым вашлияш ямдылалтеш. Йошкар-Олам ты кугу форумлан келшышын сӧрастарат.
Марий Элын тӱвыра, савыктыш да калык-влакын пашашт шотышто министр, оргкомитет вуйлатышын алмаштышыже Константин Иванов Погынын заседанийже-влакым у тӱвыра объектлаштат (Келышмаш пӧрт, Национальность-влак пӧрт, Индустрий школ) эртараш темлен. Министрын палемдымыж почеш, Погынын участникше-шамычым тӱрлӧ тӱвыра мероприятийыш (сӱретче-влакын выставкышкышт, Марий касыш, руш ден марий спектакльлаш... ) ӱжыт. Республикысе телевидений, радио ден газетлаште Погын вашеш передаче ден материал-влак лийыт. Марий паркымат тунамак почыт.
Оньыжа Э.Александров Марий Эл Правительствылан Погыным ямдылымаште да эртарымаште полшымыжлан тауштен.
Марий Элым вуйлатыше Юрий Зайцев ты йодыш дене кылдалтше темлымаш-влакым сайлан шотлен да оргкомитетын еҥже-влакымат кӱлеш годым лекше йодышым шотыш кондаш полшаш йодын.
Черетан Марий калык погыным шушаш ийын могай кечыште эртараш тӱҥалмым 13 октябрьыште Мер Каҥашын пленумыштыжо рашемдат.
С.Пехметова
