Тиде кечылаште Марий Элыште Россий Федераций Просвещений министр Сергей Кравцов ден Юл кундем федеральный округышто Россий президентын полномочный представительже Игорь Комаров лийыныт.
Сергей Кравцов Юл кундем федеральный округышто образований системым вияҥдыме йодыш дене кылдалтше совещанийым эртарен. Тушто Марий Элым вуйлатыше Юрий Зайцев, Федераций Советын председательжын алмаштышыже Константин Косачёв да Юл кундемысе чыла регионжо гыч еҥ-влак лийыныт.
«Федераций Советын председательже Валентина Ивановна Матвиенко дене федеральный округышто ик эн пӱсӧ йодышлам каҥашымылан пӧлеклалтше тыгай вашлиймаш-шамычым эре эртараш мутланен келшенна. Марий Элыште да Юл кундем федеральный округышто Россий президентнан чыла кӱштымашыже жапыштыже шукталтеш, «Образований» национальный проект илышыш пурталтеш. Чыла паша чарак деч посна ышталтеш. Тыгак лийшаш, вет еҥ-влак школым чоҥымым але тудым капитально олмыктымым вучат. Самырык тукымлан воспитанийым пуымо паша дене кылдалтше моло задачымат мыланна каҥашаш кӱлеш», – каласен министр.
Юл кундем федеральный округышто Россий президентын полномочный представительже Игорь Комаровын палемдымыж почеш, «Образований» национальный проект дене келшышын, Юл кундем федеральный округын чыла регионыштыжат образований сферын инфраструктуржым уэмден вияҥдыме дене кылдалтше кугу мероприятий-шамыч эртаралтыт. Тыгак тудо обороно-промышленный комплекслан специалист-влакым ямдылыме, кыдалаш да общий образованийым тачысе экономикылан келшышын вияҥдыме нерген каласкален.
Паша вашлиймаш годым Марий Элым вуйлатыше Юрий Зайцев каласен: «Мемнан регионлан тӱткышым ойырымылан, кундемыштына ышталтше пашалан сай акым пуымылан да образований системыланна полшымылан Сергей Сергеевичлан тауштем. Федераций Советыште темлымашна-шамыч кокла гыч шукыжым сайлан шотлымылан да нуным кӱштымашлаш пуртымылан – тау. Тыгай каҥашымаш образований системыште у кушмо точкым палемдаш, регион-влак кокласе вашкылым пеҥгыдемдаш да паша опыт дене палдараш йӧным ышта».
Регионым вуйлатыше тыгак республикыштына школым чоҥымо да капитально олмыктымо дене кылдалтше программым илышыш пуртымо дене палдарен. Тидын деч посна тудо Сергей Кравцовым кундемыштына кок тунемме верым чоҥен пытараш ешартыш окса средствам ойыраш полышым пуымыжлан тауштен. «330 миллион теҥге – регионысо бюджетлан кугу полыш», – каласен Юрий Зайцев.
Каҥашымаш деч вара тудо Россий Федераций Просвещений министрым Медведевысе 4-ше №-ан кыдалаш школ дене палдареныт. Моло уна-влак дене пырля тудо Отечествын Геройжылан пӧлеклалтше Патырлык урокышто лийын. Вашлиймаш годым Сергей Кравцов кок туныктышылан, специальный военный операцийын участникше-влак Александр Богатырёв (Медведево районысо Сенькан школын педагогшо) ден Геннадий Ефремовлан (Марий политехнический техникумын мастерже) Россий Федерацийысе Просвещений министерствын Тауштымашан серышыжым кучыктен.
Школышто лиймыж годым тудо тыгак тунемше-влак дене вашлийын, нунын дене «Основы безопасности и защиты Родины», «Труд» предметла нерген ойлен. Ушештарена, нуныжым йоча-влак шушаш тунемме идалыкыште тунемаш тӱҥалыт.
Паша вашлиймаш Йошкар-Оласе Курымашлык тул ончыко пеледышым пыштыме дене мучашлалтын. «Кугу Отечественный сарын ветеранже да кызыт шочмо элнам специальный военный операций кайыме кундемыште аралыше боецна-влак дене кугешнена. Икоян улмо да шочмо элым йӧратымаш – россий калыкын ойыртемже. Лач тиде мыланна тушманым сеҥаш эреак полшен да кызытат полша», – каласен Юрий Зайцев.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен
