Юрий Зайцев Марий Элыште «Знание» Россий обществын эскерыше советшым вуйлаташ тӱҥалеш.
Республикым вуйлатышын кандидатуржым палемдыме обществын регионысо пӧлкажын тӱшка погынымашыштыже пеҥгыдемденыт. Тушто Марий Эл правительстве председательын икымше алмаштышыже Евгений Кузьмин, «Знание» обществын генеральный директоржо Георгий Будный, МарГУ-н ректоржо Михаил Швецов да молат лийыныт.
Эскерыше совет обществын регионысо пӧлкажын просветитель пашам вияҥдыме дене кылдалтше йодыш-влакым каҥашыше органлан шотлалтеш. «Ме кызыт просвещений сферыште пашам вияҥдена. Марий Элысе тӱрлӧ площадкыште «Знание» обществын мероприятийлаже-шамыч эртат, проектлашке молодёжь чолган ушна. Лектор сообществын йӧнжым кумдаҥдаш да просветитель мероприятийлам эртараш кугу тӱткыш регионысо пӧлка ден филиал-влакын вияҥмыштлан ойыралтеш», – палемден Георгий Будный.
Эскерыше советын председательжылан Юрий Зайцевым ойырымо гын, тудын алмаштышыжын пашажым Евгений Кузьмин шукташ тӱҥалеш.
Кызытлан тыгай орган Российын 20 регионыштыжо уло, ынде нунын деке Марий Элат ушнен. Идалык мучаш марте эскерыше совет элнан 60 регионыштыжо пашам ышташ тӱҥалеш.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен
