25 октябрьыште регионым вуйлатыше Юрий Зайцев Россий парламентын кӱшыл палатыжын председательже Валентина Матвиенком Марий Элын выставкыж дене палдарен, туштыжо Марий кундемын шумо сеҥымашыжым кумдан ончыктымо.
Республикым вуйлатыше Марий Элын сеҥымашыже да ончыкылык планже нерген каласкален. Федераций Советын председательже эҥер туризмым вияҥдымаште Марий Элым сай ончыкылык вуча манын палемден. Тудо тыгак республикын ялозанлык отрасльлан,культурлан, IТ-индустрийлан пӧлеклалтше стендше-влакым ончен савырнен.
Федераций Советыште Марий Эл Республикын кечылажым эртарымаште рӱдӧ событийыш «Россий Федерацийын субъектшын шагатше» савырнен.
Тидын годым регионын шумо сеҥымашыж дене палдареныт. Валентина Матвиенко республикым вияҥдыме индивидуальный программым шуктымаште, транспорт инфраструктурым ыштымаште шумо сеҥымашым, казам ашнымаште сай ончыкылык улмым палемден, Марий Эл калыкым шушаш Икоян улмо кече да Республикын кечыж дене саламлен. Тудо тыгак СВО-н участникше-влаклан, Запорожье областьын шефыш налме Куйбышев районжылан полшен шогымылан Марий Эллан таум каласен.
Республикым вуйлатыше Юрий Зайцев Федераций Советын пленарный заседанийыштыже ойлымыж годым калыкын илышыжым саемдымашке да экономикым вияҥдымашке виктаралтше национальный проект ден кугыжаныш программе-влакым шуктен толмо нерген каласкален.
Федераций Советын полшымыж дене Йошкар-Ола ден Москва да Санкт-Петербург коклаште авиакылым уэш ыштыме, медицине учреждений, илыме вер да коммунал озанлык объект-влакым чоҥымо, ятыр моло мероприятийым эртарыме, палемден Юрий Зайцев.
Республик, вий-куатшым ешарен толын, чылажымат шкалан шке ситараш тырша. Тӱҥ отрасльлаште 77 инвестиционный проектым илышыш шыҥдараш, культурын, здравоохраненийын, туризмын кӱлешан 30 объектыштым ышташ, кок районышто газым пурташ палемдыме, каласен регионым вуйлатыше.
Федераций Советын пунчалжын проектшым ФС член-влакын темлыме ойыштым шотыш налме негызеш умбакыже саемден тӧрлаш да Россий парламентын кӱшыл палатыжын черетан пленарный заседанийыштыже ончаш ойым пидме.
