Марий Эл вуйлатыше Юрий Зайцев Йошкар-Ола аэропортышто у пассажир терминал кузе чоҥалтмым ончен савырнен.
Тачысе кечылан у терминалын зданийже 50,5 процентлан ямде. Тудым тӱжвачын ковыжлымо, яндам шындыме, леведме. Кызыт кӧргыштӧ пӱлымӧ, отделкым ыштыме, инженер системым монтироватлыме паша шуйна. Объектыште 100 наре еҥ тырша, паша ик кечынат чарнен ок шогал. Аэропортлан кӱлшӧ чыла оборудованийым налме.
Кок пачашан у терминал 6 тӱжем квадратный метр кумдыкан да национальный тӱслан келыштарыме лиеш. Тудым пашаш колтымо дене аэропорт шагатыште 400 пассажирым колтен кертеш. У терминалым 2024 ий мучашлан шуктышаш улыт.
Республик вуйлатышылан увертареныт: аэропорт гоч пассажир кайымаш 2023 ийын 10 тылзыште 2019 ийысе деч 13 тӱжемлан ешаралтын. Тудым пужен ыштыме деч вара тиде чот 4 пачаш кугемшаш.
У терминалым чоҥымо дене пырляк аэропортышто самолёт шичме да нӧлталтме полоса пужен ышталтеш. Тылеч вара Йошкар-Ола аэропорт 200 еҥ пурыман юж судным вашлийын кертеш. Пассажирым вашкерак шупшыкташ тӱҥалшашлан тусо пашам келшышын виктарен колтымо нерген йодышым Федераций Советыште Марий Эл Республикын кечыж годым каҥашыме.
Аэропортым уэмдыме паша Марий Эл Республикым социальный да экономике могырым вияҥдыме индивидуальный программе дене келшышын шукталтеш.
Юрий Зайцев палемден: республикысе аэропортым пужен ыштымаш да вияҥдымаш калыклан пеш кӱлешан.
Марий Эл вуйлатышын пресс-службыжын уверже негызеш Ю.ИСАКОВ ямдылен.
