Марий Эл вуйлатышын пашажым жаплан шуктышо Юрий Зайцев республикым вияҥдыме стратегийым ышташ эн сай шонымаш ден темлымаш-влакын авторышт дене вашлийын.
Ик тылзе жапыште муниципал образованийлаште 17 стратегический сессий лийын, чылаже 12 тӱжем наре темлымаш погынен. Юрий Зайцевын ойлымыж почеш, ынде нунын дене пашам ышташ тӱҥалыт.
Тудо стратегийым лачшымак республикыште илыше-влакын темлыштым кӱлешанлан шотлен палемден.
– Агропромышленный комплекс Российын кочкыш безопасностьышкыжо кугу надырым пышта. Марий продукцийым пӱтынь элна мучко палат, кеч тунар кумданжак огыл, кузе лиеш гын, сай ыле. Тидын нерген темлымашлаштат ойлалтын. Мемнан задачына – тугай кӱкшытыш лекташ, кунам ны йот элласе кычке, ны тусо презе кӱлеш огыт лий. 11 августышто президент дене мутланымем годым тудо лач тидын нерген посна ойырен каласыш, – ойлен Юрий Зайцев.
Республик вуйлатышын пашажым жаплан шуктышо тыгак регионым уна-влаклан толашышт утларак йӧнаным ышташ кӱлмӧ нерген каласен. IT-сферыланат кугу тӱткышым ойырен.
Ямдылыме стратегийыш тыгак кӱшыл да кыдалаш образованийым вияҥдыме дене кылдалтше темлымаш-влакат пурталтыт. Иктыже, мутлан, тыгай лийын: самырык преподаватель-влаклан полшымо программым ышташ.
Юрий Зайцев тазалыкым аралыме йодышымат палемден. Тудо республикыште илыше-влакым транспорт, коммунал озанлык да социальный инфраструктур дене кылдалтше йодыш-влак тургыжландарыме нергенат ойлен.
– Эн кӱлешанже да тӱҥжӧ – еҥ-влакын илышыштым саемдышаш верч тыршыман. Тиде негызеш мероприятий-влакым эртарыман. Ончыкыжым тидым паша планыште шотыш налаш темлем, – палемден Юрий Зайцев.
Марий Эл Республикым вуйлатышын организаций да аналитике виктемжын уверже негызеш Л.Камалетдинова ямдылен
