Марий Элым сай велым палемденыт

В.Мутко Марий Элыште экономический ситуаций могай улмо шотышто поснак палемден ойлен да регионын Россий Федерацийын социально-стабильный субъектше-влак радамыште улмыж нерген каласен, кугыжаныш парым кушмым пытарыме шотышто чыла обязательствым шуктымыж нергенат палдарен.

- Лишыл жапыште ме оргкомитетын юбилей шотышто заседанийжым эртараш ямдылалтына, сандене чылажымат эше ик гана каҥашена, - Марий Элын 100 ияш лӱмгечыжым палемдышашлан ямдылалтме нерген ойлымыж годым ешарен Виталий Мутко.

Заседанийын иктешлымашыже нерген ойлышыжла, Марий Эл вуйлатыше республикын лишыл жапыште кузе вияҥшашыж да нацпроект-влаклан кӧра могай вашталтыш-влак лийшаш нерген радамлын каласкален.

Тыгак тудо Москваште лиймыж жапыште РФ чоҥымаш министр Владимир Якушев дене вашлиймаш эртыме нерген ойлен.

- Кодшо арняште правительстве председательын лукмо пунчалже дене тудо мемнан республикым курироватлыше министрлан палемдалтын.

РФ финанс министрын икымше алмаштышыже Леонид Горнин дене гын ме Перинатальный рӱдерым уэмден тӧрлатышашлан оксам ойырымо йодышым каҥашенна, - каласен Александр Евстифеев, палдара Марий Эл вуйлатышын организаций да аналитике виктемже.