9 февральыште Саратов олаште Россий Федераций Юл кундем федеральный округын кугыжаныш кучемжын Законым лукшо органже-влакын ассоциацийыштын LXXI заседанийже эртен. Тудо специальный военный операцийын участникше-влак ден нунын ешыштлан полшымо мерым ыштыме пашаште нормо ден правам палемдыме йодыш-шамычлан пӧлеклалтын.
Президентын ПФО-што полномочный представительже Игорь Комаровын палемдымыж почеш, тиде пашашке округысо чыла регион чолган ушнен. Военнослужащий-шамычлан полшаш чылаже 18 миллиард наре теҥгем ойырымо. Регион-влаклан икте-весышт деч сай опытым, ты шотыштак СВО-н участникше-шамычлан реабилитацийым эрташ йӧным ыштыме, нунын родо-тукымыштлан психологий полышым пуымо шотышто, кӱсынлан кӱлешан.
Регион-влак полшымо шке мерыштымат пуртат. Марий Элын тулык йочалан шотлалтше военнослужащийлан илыме вер ден жилищный сертификатым ик эн ончыч ойырымо практикыжым сай велым палемденыт.
Марий Эл Кугыжаныш Погынын председательже Анатолий Смирнов СВО-н участникше-влаклан абилитацийым эртарыме йӧн-шамыч: паша рынкыште ик эн кӱлешанлан шотлалтше профессийлан туныктымаш, психологический, консультативный да адресный полышым пуымаш, тӱвыра ден сымыктыш тӧнежлашке яра, а спорт объектлашке льготан ак дене пуртымаш – дене радамын палдарен, тыгак СВО-н участникше-влак ден нунын ешыштлан социально-психологический полышым пуымо ик абилитационный стандартым ышташ темлен.
Заседанийыште, СВО-н участникше-влак ден нунын ешыштлан эшеат кугун полшаш манын, федеральный закон ден нормативный актлашке ятыр вашталтышым пурташ темленыт.
Саратовышто Юл кундем федеральный округын Молодёжный парламентше-влакын ассоциацийыштат пашам ыштен. Самырык-шамыч кугурак коллегышт дене пырля олан ятыр социальный объектышкыже лектын коштыныт, верысе вузласе шанчызе-влакын пашашт, регионысо здравоохраненийын тӧнежлаштыже СВО-н участникше-шамычлан адаптаций ден реабилитацийым эртарыме тӱрлӧ йӧн дене палыме лийыныт.
Округын законодательже-влак ден нунын самырык коллегышт «Сарзе да паша чап тоштер» историко-патриотический комплексыште лийыныт, Курымашлык тул да «Локальный сарлаште вуйым пыштыше земляк-влаклан» мемориал ончылан пеледышым пыштеныт.
Самырык парламентарий-влак тыгак волонтёр мер организацийлам вуйлатыше-шамыч дене вашлийыныт.
Чыла объектыште лийме деч вара А.Смирнов палемден: «Саратовец-влакын калыкым патриотизм шӱлышеш куштымо, историй поянлыкым арален кодымо, СВО-н сарзыже-влакым курым гыч курымыш шарнаш кодымо, спецоперацийын участникше-влак ден нунын ешыштлан полшымо системым вияҥдыме пашаштым моло регионланат кӱсынлаш кӱлеш. Тыште самырык тукымым областьын, шочмо элын историйышт дене палдарымылан кугу тӱткыш ойыралтеш».
М.Иванова
