Республик вуйлатыше Юрий Зайцевын кӱштымыж почеш Марий Эл Оренбург областьыште вӱдшорлан кӧра туткарыш логалше-влаклан гуманитар полышым пуа.
Тиде полышым политический партий-влакын региональный да верысе отделенийлаштышт, республикысе олалаште да районлаште калыкым социально обслуживатлыме комплексный рӱдерлаште, религиозный конфессийлаште чумырат. Ты пашашке организаций, предприятий, бизнесъеҥ, тыгак волонтер ден мер организаций-влакын еҥышт ушненыт.
Кызыт верысе производитель-влак деч кленчалашке темыме 15 тонн йӱшаш вӱдым, 3 тонн дезинфицироватлыше «Ника» средствым колташ ямдылалтыт.
Тылеч посна Марий Элын Тазалыкым аралыме министерствыже Оренбург областьын Тазалыкым аралыме министерствыж дене кылым ыштен да кӱлшӧ препаратым, медикаментым чумыраш тӱҥалын.
Республикысе Т.Евсеев лӱмеш национальный тоштер Орскысо краеведений тоштерын туткарыш логалше пашаеҥже-влаклан целевой полышым пуаш средствым пога.
Оренбург областьыште азапыш логалше еҥ-влаклан гуманитар полышым пуымо шотышто пашам республикын правительствыже умбакыже шуя.
Марий Элыште илыше-влак, предприятий ден организаций-шамыч туткарыш логалше-влаклан эл мучко оксам погымашке ушнен кертыт. Тудо Россий президентын Юл кундем федеральный округышто полномочный представительже Игорь Комаровын аппаратшын полшымыж дене эртаралтеш.
Марий Эл вуйлатышын пресс-службыжын уверже негызеш Л. Камалетдинова ямдылен
