Аэропортысо у пассажир терминалым тений идалык мучаште ыштен шукташ палемдыме. А самолёт шичме-нӧлталтме корным кодшо шыжым гына пужен ышташ тӱҥалме.
Федерал окса дене корным лопкаҥдаш да кужемдаш, командно-диспетчерский пунктын у зданийжым чоҥаш, самолёт-влак шогымо верым, вӱд йоген кайыме сетьым да молым ышташ палемдалтеш.
Контракт почеш паша 2027 ий мучашлан пытышаш, но республикын правительствыже чоҥымо жапым кӱчыкемдаш йӧным кычалеш. Самолёт шичме-нӧлталтме корным пужен ыштыме пашам пассажир терминалым чоҥымо дене ик жапыште шуктымо нерген ойым федерал кӱкшытыштат сайлан шотлымо, но тидлан ешарен финансироватлыме кӱлеш.
Пужен ыштыме деч вара самолёт шичме-нӧлталтме корно 2,701 тӱжем метр кутышан да 42 метр лопкытан лиеш. Тидыже 200 марте пассажир шинчын кертме кугытан юж судным вашлияш да келшыше ак дене авиарейсым шукемдаш йӧным пуа.
Марий Эл вуйлатышын пресс-службыжын уверже негызеш Ю. Исаков ямдылен
