Марий Эл вуйлатыше Юрий Зайцев Россий Федерацийыште региональный вияҥмаш шотышто правительственный комиссийын президиумжын заседанийжын пашашкыже ушнен. Тудым Россий правительстве председательын алмаштышыже Марат Хуснуллин видеоконференций йӧн дене эртарен.
Заседанийыште регион-влакын чоҥымаш отрасльыште паша лектышыштым иктешленыт, 2023 ийлан планым каҥашеныт.
Марий Эл кодшо ийым сайын мучашлен: «Юлым тазаҥдарымаш» федеральный проектым илышыш пуртымо дене чыла субъект коклаште республикна икымше верыш лектын, корным чоҥымо дене – 8-ше верыште, илыме верым илаш пураш йӧршым ыштен шуктымо дене – 13-шо верыште, «Оласе йырвелым йӧнаным ыштымаш» проектым илышыш шыҥдарыме шотышто – 16-шо верыште. «Илыме вер» федеральный проект дене келшышын мероприятий-влак 112 %-лан шукталтыныт. Чылаже 431,9 тӱжем квадрат метр илыме верым чоҥымо. Тидыже ондакысе деч 1,2 пачашлан шукырак. «Оласе йырвелым йӧнаным ыштымаш» федеральный проект почеш чылаже 92 кумдыкым: тӱшкан пайдаланыме 55 верым да 37 кудывечым – тӱзатыме шотышто паша мучашлалтын. Ӱмаште 2393 еҥым вес вере илаш кусарыме. Тидыже 2022 ийлан палемдыме план деч 143,3 % лийын. Кодшо ийын 228,15 километр кужыт корным чоҥымо. Тыгак капитально чоҥымо да олмыктымо паша 7 вере шукталтын: Медведево поселкышто школым, тиде районысо Краснооктябрьский поселкышто врачебный амбулаторийым нӧлтымӧ, У Торъял районысо Чӱксолаште тӱвыра пӧртым уэмден тӧрлатыме, Волжский районышто вӱд сетьым, Морко поселкышто вӱдым пушкыдемдыше станцийым, Приволжский поселкышто водозаборым, Волжск олаште Спорт полатым чоҥымо.
Марий Эл вуйлатыше ӱшанен палемден: 2023 ийыштат кучем вуйлатыше-влак федеральный да регионысо проект-влакым шумо кӱкшытым арален коден да пашам эшеат чулымын шуктен, илышыш пурташ тӱҥалыт.
Марий Эл вуйлатышын администрацийжын информаций паша пӧлкажын уверже негызеш Л.Камалетдинова ямдылен
