Марий Эл – кудымшо верыште

22 апрельыште Марий Эл вуйлатыше Александр Евстифеев РФ правительстве пеленысе у коронавирус инфекций шарлыме ваштареш кучедалме шотышто координационный советшын президиумжын да РФ Кугыжаныш советын у коронавирус шарлыме ваштареш виктарыме паша шотышто пашаче группын заседанийышкыже ушнен. Совещанийым Россий премьер-министр Михаил Мишустин эртарен. 

Коронавирус дене черланыше-влаклан полышым пуышашлан медицине организаций-влаклан койко фондым ешарен ыштышашлан да перепрофелироватлышашлан тачысе кечылан Марий Эллан федеральный бюджет гыч 272 млн. теҥге ойыралтын. 87,56 млн. теҥге медицине пашаеҥ-влаклан тӱлышашлан, 13 млн. утла теҥге медицине техникым налаш колталтын. 

Республиканский бюджет гыч 175,4 млн. теҥге ойыралтын. Тышеч 20,5 млн. теҥге – ИВЛ (искусственная вентиляция легких) аппаратым налаш, 6,1 млн. теҥге – обсерватор ыштыме дене кылдалтше пашалан, молыжо -  дезинфицироватлыше  средстве ден эмым, медицине пашаеҥ ден моло бюджет учреждений пашаеҥ-влаклан индивидуальный аралалтмаш средстве-влакым налаш.

Мониторингым эртарыме жапыште 12,5 утла тӱжем лабораторный шымлымашым ыштыме. 100 тӱжем еҥлан шотлымаште тестирований дене эртарен  авалтыме шотышто Марий Эл Российыште 6-шо верыште. У типан коронавирусым рашемдышашлан регионыштына кызыт кажне кечын чылаже 500 пробо ышталтеш. Тидыже тӱҥ риск группым авалташ утыжденат ситымылан шотлалтеш.

Эпидемиолог-влак кӱлшӧ противоэпидемический мероприятийын тӱрыс комплексшым эртарат. Тидыже инфекцийлан умбакыже шарлашыже чаракым ышта. Посна тӱткыш пӧлемым, транспортым, тӱшкан пайдаланыме кумдыкым  дезинфекцироватлымылан ойыралтеш. Специальный средствым шыжыктен, эн ончычак инфекций пижме эн кугу лӱдыкшӧ улман кумдык-влакым    обрабатыватлат. Тиде общественный транспорт остановко-влак, медучреждений, аптеке, кочкыш сату кевыт-влак воктенысе кумдык улыт.