Российысе Чоҥымо паша да илыме вер ден коммунал озанлык министерствыште министр Ирек Файзуллин Марий Эл ден Калмыкий вуйлатыше-влак Юрий Зайцев да Бату Хасиков дене вашлийын.
Тушто «Илыме вер да регионлаште оласе кумдык» нацпроект илышыш кузе шыҥдаралтме да чоҥымо илыме верлашке илаш пуртымо йодыш-влакым каҥашеныт. Россий Федерацийысе субъектлаште 8 тылзыште чоҥымо пашам шуктымо дене кок регионжат 30 эн сай радамыш пурталтыныт.
Марий Элыште тиде жапыште 346,1 тӱжем кв.метр илыме верым эксплуатацийыш колтымо. Тидыже ӱмашсе дене таҥастарымаште 62,6 процентлан шукырак. Калмыкийыште кодшо ийысе дене таҥастарымаште тенийысе кугыт 33 процентлан ешаралтын да 88,8 тӱжем кв.метрыш шуын.
Тыгак вашлиймаште Йошкар-Олаште канализацийым эрыктыме сооружений-влакым да Волжскышто канализацийын биологический эрыктыме сооруженийже-влакым уэмден тӧрлатыме нерген мутланеныт. Юрий Зайцев палемден: тыгай кугу проект-влакым илышыш шыҥдарымаш ола-влакым вияҥдаш виктаралтыныт да чоҥымо пашам эшеат шукырак шуктымаште кӱлешлыкышт кугу. Адакшым тиде йодышым решатлымаш еҥ-влакын илыш условийыштым, качествыштым саемдаш полша. Тыгак тидын дене производственный предприятий-влакын пашам кузе ыштымышт кылдалтеш, ойлен республик вуйлатыше.
Кодшо курымын 60-шо ийлаштыже чоҥымо нине сооружений 90 процентлан тоштемыныт. А нуным уэмден тӧрлаташ гын, вӱд-пуч да канализаций дене кылдалтше йодыш ончыкыжым икмыняр лу ий тургыжландараш огеш тӱҥал. Молан манаш гын, сооружений-влакым шотыш кондымо дене пырля эше тушко у оборудованийым вераҥдат да процесс-влак автоматически шукталтыт. Тыге ончыкыжым Юл эҥерышкат амыртыш шагалрак логалаш тӱҥалеш.
Марий Эл Республикым вуйлатышын организаций да аналитике виктемжын уверже негызеш Л.Камалетдинова ямдылен
