Лишыл жапыште пеҥгыдемдалтеш

Тушто Марий Эл Республикын 2020-2024 ийлан социальный да экономике могырым вияҥме посна программыжым пеҥгыдемдыме нерген мутланыме. Ты документыште инвестиций проектлам илышыш пуртен толмо, корным шотыш кондымо, илыме вер ден коммунал озанлыкым уэмдыме, электровийлан тарифым тӧрлымӧ, предпринимательстве ден туризмлан вияҥашышт йӧным ыштыме, тыгак паша верым шукемдыме да калыкын доходшым кугемдыме кӱшеш йорлылыкым иземдыме дене кылдалтше корнылам рашемдыме.

Ты программе лишыл жапыште пеҥгыдемдалтеш, тидлан сай тӱҥалтыш уло – февраль мучаште Россий правительстве Курган областьын икымше тыгаяк программыжым сайлан шотлен, каласен Владимир Якушев. Но тидлан ойырымо окса, ешарен тудо, тӱҥ шотышто экономике куатым кушташ кайышаш.

Россий правительстве федерал бюджет гыч мыняр окса ойыралтшашым рашемден. Тудо кок йыжыҥ дене колталтеш. Марий Элым социальный да экономике могырым вияҥдыме посна программым шуктышашлан 2024 ий марте 5 миллиард теҥге ойыралтеш. Тылеч вара республик эше 5 миллиард теҥгем налын кертеш, но  икымше йыжыҥым сайын эртымеке да программын пайдале улмыжо рашеммеке. Тылеч посна регионыш национальный проектла почеш ресурс пурышаш.

Марий Эл вуйлатыше йодышым тыге кӱлын ончымылан Владимир Якушевлан таум ыштен да палемден: регионлан инноваций негызеш вияҥашыже келшыше площадке кӱлеш, ме бизнеслан производствым шарен толашыже полшаш ямде улына.