Марий Эл Республикын агропромышленный комплексшын шумо кӱкшытшӧ дене Нижний Новгородышто эртыше регион кокласе совещанийыште палдарыме.
Ялозанлык да ветеринарий дене кылдалтше совещанийыш Нижегородский областьысе да Марий Элысе кугу агробизнес вуйлатыше-влак погыненыт. Мероприятийым Россельхознадзор вуйлатыше Сергей Данкверт вӱден.
Регионын делегацийжым Марий Эл Республик правительстве председательын алмаштышыже Дмитрий Троицкий вуйлатен. Делегаций радамыште Марий Эл Республикын ялозанлык да кочкыш сату министрже Андрей Кондратенко, республикын ветеринарий комитетшын председательжын пашажым жаплан шуктышо Евгения Коваль, агробизнесын еҥже-влак лийыныт. Совещанийын участникше-влак Марий Эл Республикын да Нижегородский областьын 2023 ийыште агропромышленный комплексыштын паша лектышыштым да 2024 ийлан вияҥме корным каҥашеныт.
Марий Элын АПК-же вияҥме шотышто сай кӱкшытыш шуын. Вольык да продукций ямдылымаш ешаралтыт, ончыч кучылталтдыме ялозанлык мланде уэш пасушко савырна, жаплан келшыше техникым налыт, у технологий шыҥдаралтеш. Агропромышленный комплекс предприятий-влак шуко тӱрлӧ кочкыш сатум ямдылат. Тыге ялозанлыкна пасу гыч прилавке марте пайдале корным илышыш икшырымын шыҥдарен толеш.
Совещанийын участникше-влак вольыкын да сурткайыкын поснак осал черышт шарлен кертме лӱдыкшым кораҥдыме йодышым каҥашеныт.
Республикыштына биологический лӱдыкшыдымылык дене кылдалтше йодыш-влакым Марий Эл правительстве эреак шинча ончылныжо куча. Ветеринарий дене кылдалтше йодыш-влакым рашемдышашлан шуко мерорприятий эртаралтеш, тыгак вольыкым учетыш налыт. Биологический лӱдыкшыдымылык лачак кучемын чыла органже, тыгак еҥ-влакын пашам пырля ыштымышт годым гына шукталтеш.
Марий Эл вуйлатышын пресс-службыжын уверже негызеш В.СМОЛЕНЦЕВ ямдылен.
