Марий Эл вуйлатыше Ю.Зайцев регионыштына 29 июльышто озыркан мардеж да шолемлан кӧра лийше азапым кораҥдыме шотышто могай паша ышталтымым штабын черетан заседанийыштыже лончылен.
Ю.Зайцев тӱтан деч вара пашам ыштыше чыла службылам тауштен. Правительстве председательын алмаштышыже С.Воронцов азапым кораҥдыме шотышто мом ыштыме нерген каласкален. Тачысе кечылан чыла аварийно-утарыме, кызытак ыштышашлык паша мучашлалтын. Эҥгекыш логалше объектлаште электроснабженийым тӧрлымӧ. Оралтылан леведышлажым кандаш муниципал образованийыште, нунын коклаште Советский, Шернур, Морко районласе кум школышто, олмыктымо. Волжский районысо ныл ялозанлык предприятийыште олмыктымо паша кая. Республикысе Паша, социальный аралтыш министерствыжын ведомствышкыже пурышо ныл объектым ачалаш палемдалтеш.
Тыге чрезвычайный ситуаций лийын кертме лӱдыкшӧ улмылан, шокшо игечылан кӧра лектын шогышо лӱдыкшым жапыштыже ужын шогаш манын, Марий Элыште утларак ямде улмо режимым 2023 ий 7 гыч 28 август марте ыштыме нерген темлымашым Юрий Зайцев сайлан шотлен.
Министерстве ден ведомствылам, муниципальный образованийлам вуйлатыше-влакын докладыштым колыштыныт. Пӱртӱс поянлык, экологий да йырвелым аралыме шотышто министр А.Киселев 29 июльышто лийше озыркан мардеж Кокшайск, Звенигово, Куяр, Пригородный чодыралаште озаланен да пушеҥгым йӧрыктылын манын каласен. Кызыт тӱҥ чодыра корно-влакым эрыктыме, умбакыжым просеклам шотыш кондат.
Транспорт ден корно озанлык министр А.Герасименко корно организаций-влакын диспетчер службыштын, МЧС-ын, ГИБДД-н, районласе единый диспетчер службо-влакын пырля да келшен пашам ыштымыштлан кӧра автомобиль корнылаште нелылыкым жапыштыже шекланеныт манын палемден. Тыге подрядный организаций-влак 30 июльышто 200 утла пушеҥгым корныла гыч кораҥденыт, 100 процент корно сетьым тергеныт, йӧрлшӧ ден локтылалтше корно знаклам тӧрленыт.
Образований да науко министрын пашажым жаплан шуктышо В.Гаврилова ныл лагерь эҥгекыш логалмым палемден. Кызыт каныме да тазалыкым пеҥгыдемдыме чыла йоча лагерь пашам ышта, тусо кумдыклам эрыктыме.
Ю.Зайцев кажныжын пашам сайын ыштымым палемден да чыла лончылаш, ончыкыжым лийын кертше эҥгекым кораҥдаш да иземдаш манын каласен.
Марий Эл Республикым вуйлатышын администрацийжын информаций паша пӧлкажын уверже негызеш Л.ШАБДАРОВА ямдылен
