Кылым ышташ темлен

Марий Эл вуйлатыше Александр Евстифеев Наказанийым шуктышо федеральный службын Марий Элысе управленийжын начальникше Сергей Евтушенко дене вашлийын.

Нуно тӱҥ шотышто судитлыме-влакын пашам ыштымышт дене кылдалтше йодышым каҥашеныт.

- Кызыт исправительный учрежденийлаштына сӱрет сай. Подразделений-влакым тӱзатыме паша эртаралтеш. Тидлан федеральный бюджет гыч окса ойыралтын. Кумшо тӱшкашке пурышо 37 территориальный орган коклаште, а тушко 6 тӱжем деч шагал еҥ шинчыме учреждений-влак пурат, ме 16-шо верыште улына. Кодшо ганасе деч 11 верлан кӱшкырак нӧлталтынна, - палдарен Сергей Евтушенко.

Александр Евстифеев Марий Элысе УФСИН начальниклан судитлыме-влаклан паша верым ситараш манын, кучем орган да бизнес-структур-влак дене кылым кучаш кӱлмӧ нерген поснак палемден каласен.

- Исправительный учреждений-влак пелен кум профессиональный училище уло. Эрык деч посна кодымо-шамычым тушто токарь сомыллан, кӱртньым тапташ, пу дене пашам ышташ, ургаш туныктена. Йодмаш-влак улыт, но тошто оборудований нелылыкым луктеш. Ӱмаште Тазалыкым аралыме министерстве дене пашам ыштенна: вакшыш шартышым да медперсоналлан вургемым ургенна, - ойлен республикысе УФСИН вуйлатыше.

Сергей Евтушенкон палдарымыж почеш, Марий Элысе исправительный учрежденийлаште ямдылыме сатум Москваште, Санкт-Петербургышто, Ивановышто да Чувашийыште кумылын налыт.

Тунемме нерген ойлаш гын, нине учрежденийыште ӱмаште чылаже 980 еҥ шинчымашым налын.