Кужун олмыкталтше эше ик пӧрт шагалемеш

​Йошкар-Олаште инспекций тергымаш деч вара кумдан палыме купеч Карелинын пӧртшым пужен ыштыме пашам Марий Элым вуйлатыше шке контрольышкыжо налын.

«Южо объектын тӱжвал сынже олан градостроительствыж дене келшен ок тол. Поснак, илыме, офис да культур поянлык фондым шотыш кондыман», – ончен коштмыж годым палемден Александр Евстифеев.

Воскресенский набережныйыште верланыше 40-ше №-ан кочо пӱрымашан «Карелин пӧртат» ола историйын ик ужашыжым арала да региональный значениян культур поянлык объектлан шотлалтеш. Тудым ХIХ курымышто, а лачшымак 1840 ийыште чоҥымо. Колымшо курым тӱҥалтыште ты пӧртыштӧ земский уездный эмлымвер лийын. Ты объект теве мо дене палыме: 1934-1935 ийлаште тыште марий литературын классикше Сергей Чавайн илен. Пошкудо пачерыште марий кугыжаныш деятель, МАО облисполкомын икымше председательже, Ревком член Иван Петров илен. 2012 ий, июльышто ты пӧртыштӧ пожар лийын. Пӧрт леведыш, пу оралтын ужашыже, тӱжвал да кӧргӧ отделкыже чот пытен.

Олмыктымо годым вӱдыжгӧ логалме деч окна ден омса вишым петыркаленыт. Оралте ӱмбалым калай дене леведыныт да кокымшо пачашыш тошкалтышым келыштареныт. 2018 ий декабрь мучаште ты пӧртым пайдаланаш йӧрдымылан шотлымо.

Марий Эл вуйлатыше лишыл жапыште тудым реставрироватлыме сомылым тӱҥалаш кӱштен.

«Латкок пачеран, кок пачашан ты пӧрт пеш начар да умбакыже шолдырген локтылалтеш. Тыге лийшаш огыл. Сандене мэрийлан шушаш идалык-идалыкат пеле жапыште купеч пӧртым тӧрлен шукташ кӱштен. «Марий Элын 100 ияш лӱмгечыжым пайремлаш тӱҥалме жаплан тудо шке исторический сынжым налын шуктышаш. Тыгай йӧным муын кертмылан ӱшанем, – палемден Александр Евстифеев.

Йошкар-Олан мэрже Евгений Масловын ойлымыж почеш, ты пӧртым тӱрыс огыт пужо. Кызыт тудым аварийныйлан шотлаш да олмыкташ ямдылат.