Кужэҥер район – вияҥме корнышто

Республикым вуйлатыше эн ончычак Кугу Тумньымучаш ялысе Коҥганур кыдалаш общеобразовательный школыш миен коштын. Тиде школ марий йўлам арален кодымо да пойдарен толмо, краеведческий пашам шуктымыж дене чаплана. Школ пеленак йочасадым почмо. 2017 ийыште школым капитально олмыктымо, а 2018 ийыште котельныйыш газым пуртымо, тудым у технике дене пойдараш республикын правительствыжын резерв фондшо гыч 2,5 миллион теҥгем да верысе бюджет гыч 650 тўжем теҥгем ойырымо. Кодшо ийыште Коҥганур школышто «Россий Федерацийын цифровой экономикыже» национальный программын «Информационный структур» региональный проектшым илышыш шыҥдараш тўҥалме: 2019 ий декабрьыште информационный системе да «Интернет» дене ярак пайдаланаш йӧн ышталтын.

Александр Евстифеев котельныйым, школым, йочасадым, спортивный залым ончен савырнен, туныктышо да верысе пашаеҥ-влак дене мутланен.

Республикым вуйлатыше тыгак Кужэҥер посёлкысо рўдӧ паркым ончен савырнен. Тудым кодшо ийыште «Кызытсе жаплан келшыше городской средам ыштымаш» федеральный программе дене келшышын уэмдаш тўҥалме. Тидлан 3,9 миллион утла теҥгем кучылтмо. Тиде пашам тений мучашке шукташ палемдыме. Проектын акше 5,3 миллион теҥгеш шуэш.

Марий Элым вуйлатыше Кужэҥер районым ыштымылан 85 ий темме лўмеш эртарыме пайремыште лийын, тудыжо Кужэҥер посёлкысо культур пӧртыштӧ эртен.

Марий Элым вуйлатыше погынышо-влакым саламлен ойлымыж годым Кугу Отечественный сарыште сеҥымашыш районын пыштыме кугу надыржым палемден.

«Сар ийлаште 7390 еҥ, тидыже районышто лыше калыкын чырык наре ужашыже лиеш, Шочмо элым аралаш шогалын, тышеч пелыж деч утларак ужашыже, а лачшымак каласаш гын, 4580 еҥ фронт гыч пӧртылын огыл. Республик Кужэҥер районышто шочын-кушшо да тулан жапыште шочмо кундемым чапландарыше еҥ-влак дене кугешна», – палемден Александр Евстифеев.

Тудын мутшо почеш, кызыт Кужэҥер район вияҥме корно дене ўшанлын ончыко кая, агропромышленный предприятий-влак поснак сай лектышыш шуын толыт.

Ялым вияҥдаш кызыт национальный проект-влак поснак чот полшат, палемден Александр Евстифеев. Нуным илышыш шыҥдараш 2019 ийыште 36 миллион наре теҥге пурен, тений эше 54 миллион утла теҥге ойыралтеш.