|
Курчак театр вашке у пӧртсийым пайремла
07.04.2014
Марий Эл Республикым вуйлатыше Л.Маркелов республиканский курчак театрыште чоҥымо паша ушнен толмо дене палыме лийын. Туштак чыла подряд организаций вуйлатыше да проектировщик-влак дене совещанийым эртарен.
Тудо репетицийым эртарыме залым, технический кумдыкым ончен лектын, ончыкылык сценыште лийын. Кызыт чоҥалтше у курчак театрын кумдыкшо 10 тӱжем квадратный метр лиеш.
- Кодшо гана толмем деч вара тыште кугу вашталтыш лийын. Конешне, йодышат икмыняр уло, поснак – оксам ситарыме шотышто, но ме шке мутнам кучена, театрым пашашке колтымо срок огеш вашталт – 1 сентябряк кодеш, – манын Л.Маркелов чоҥышо-влаклан.
Чынак, эртыше кок тылзыште чоҥышо-влак ятырлан ончыко каеныт. Театрыште отделке пашам тӱҥалыныт, вашке коммуникацийым пуртен пытарат, сцене ден зрительный залым талын ыштат.
Объектыште икмыняр организаций тырша: «Марспецмонтаж» ОАО деч Йошкар-Ола ден Алёнкино ПМК, Советский ПМК, пошкудо Чуваший гыч «Минерал» чоҥышо да отделкым ыштыше фирме да молат.
- Паша эше ятырак, окса йодышат уло, но жапыштыже мучашлаш манын, правительстве кӱлеш средствам муэш. Сентябрьыште республикыште илыше еҥ-влаклан, поснак икшыве-шамычлан, чапле пӧлек лиеш. Тидлан кӧра ме пашам ыштена, - театрым ончен лекмек, республикысе СМИ-лаште пашам ыштыше-шамычлан интервьюм пуымыж годым манын республикым вуйлатыше.
Марий Эл Республик Вуйлатышын мер кыл ден увер виктемже
Кусарымаш - Е.Садовин (газет "Марий Эл")
|
Курчак театр вашке у пӧртсийым пайремла
