Россий правительстве председательын алмаштышыже Дмитрий Чернышенко, Россий Федераций президентын Юл кундем федерал округысо полномочный представительже Игорь Комаров да Марий Эл Республикын вуйлатышыже Юрий Зайцев бортовой радиолокационный комплексым ыштыме дене кылдалтше Инжиниринг рӱдерыште да «Элемент» компаний-влак группышто ик эн тӱҥлан шотлалтше Полупроводник прибор заводышто лийыныт.
Инжиниринг рӱдерыште Дмитрий Чернышенколан инноваций шотан научный разработкым ончыктеныт, тудо юж ден сандалык пространствым эскерен шогымаште да тусо объект-влакын кушто лийшашыштым рашемдымаште кучылталтеш.
Вице-премьер тыгак лабораторийлаште лийын, тушто радиолокационный комплекс ден сандалык системе-влакым математически моделироватлыме, печатный платылам проектироватлыме, ямдылыме да технически тергыме паша шукталтеш.
Марий кугыжаныш университетыште Дмитрий Чернышенколан «MarGRID» суперкомпьютерым ончыктеныт, тудо секундышто 275 триллион операцийым ыштен шукта, шуко данныйым обрабатыватлыме, пӱртӱс, технический да социальный ден экономике системылаште ятыр процессым моделироватлыме, шымлыме да планироватлыме задачым решатлаш полша. «MarGRID» Российысе суперкомпьютер-влак коклаште 19-ше верым налеш, а элысе вуз-влакын суперкомпьютерышт коклаште – 6-шо верым.
Марий Эл вуйлатыше палемден: вуз-влакын у разработкышт элыштына таҥасен кертше эрыкан экономикылан кушкашыже полшат. Нуно промышленностьыш, образованийыш да медициныш шыҥдаралтыт. Мемнан республикыште лукмо печатный плате ден кугу лектышан модуль-влак кугешнаш веле огыл таратат, тыгак отрасльлам цифровой корныш кусарен толмаште регионын кумда йӧнжым почын ончыктат.
Микросхемылан металлокерамике корпуслам ыштен лукшо Полупроводник прибор заводышто лийме годым Юрий зайцев каласен: «Элемент» группысо ты предприятийыште кызыт 1200 утла кӱкшӧ квалификациян специалист тырша. Компаний микроэлектронике промышленностьлан самырык специалист-влакым ямдылыме шотышто МарГУ дене пашам пырля ышта. Тунеммаш ден производство пашан пырля шукталтмыштлан кӧра радиоэлектронике сферыште да экономикын моло ончыл отрасльыштыже пашаеҥ ситыдыме йодыш республикыштына сайын решатлалтеш.
Марий Элым вуйлатышын пресс-службыжын уверже негызеш Ю.ИСАКОВ ямдылен
