Кундемнан вияҥме корныжым каҥашыме

Марий Элым вуйлатыше Александр Евстифеев республикын правительствыжын членже-влак дене совещанийым эртарен. Тушто регионышто национальный проект-влакым илышыш шыҥдарыме йодыш-влакым ончымо.

Мутланымаш Россий Федерацийын Чоҥымо паша да илыме вер ден коммунал озанлык министерствын верыш лекше пашаче группыжым вашлияш ямдылалтмылан пєлеклалтын. Тудыжо Марий Элым курироватла. Тыгак нацпроект-влакым шыҥдарымаште нелылыкым луктын кертше факт-влак нерген каҥашыме.

«Мутланымаш корным, социальный, тыгак гражданский строительстве дене кылдалтше объект-влакым чоҥымо нерген кая», - рашемден Александр Евстифеев.

Правительстве председательын икымше алмаштышыже Александр Сальниковын мутшо почеш, республикын министерствыже-влак лишыл жапыште рашемдышаш пўсє йодыш-влакым палемденыт да регионышто нацпроект-влакым илышыш шыҥдарымаште нелылыкым луктын кертше фактор-влакым кораҥдыме шотышто шке ужмашыштым ончыктеныт.

«Нуным темлыме ой семын чумырымо да региональный проектлашке пуртымо. Но ме ужына, икмыняр йодыш шотышто вес ончалтыш кўлеш. Мемнан деке Чоҥымо паша да илыме вер ден коммунал озанлык министерствын эксперт группыжо толеш. Шонем, тудо иктешлымашым ышта да пашам могай корно дене виктарен колтышашым каласа. Ой-каҥашнам исполнительный властьын чыла федеральный органже дене ончаш ямде улына. Ме полышым налына гын, тазалыкым аралымаште, образованийыште, корно сетьыште улшо ситуацийым саемдаш виктаралтше пашам шукемдаш эше ик ошкыл лиеш. Чылаже ме 14 министерствым авалтенна, - увертарен правительстве председательын икымше алмаштышыже.

Александр Евстифеев палемден: таче республикыште ышталтше кугу да комплексный паша регионым социально-экономически вияҥдыме концепцийым пеҥгыдемдышаш. Тудыжо Марий Элын экономикыштыже да социальный сферыштыже улшо проблеме-влакым рашемдымаште тўҥ негыз лийшаш.

Ушештарена, кодшо арняште Александр Евстифеев паша дене Москваште лийын. Тушто Россий Федерацийын чоҥымо паша да илыме вер ден коммунал озанлык министрже Владимир Якушев дене вашлийын. Вашлиймаште регионлан социально-экономически вияҥашыже полшышо фактор-влак, тыгак тўрлє отрасльлаште улшо ситуаций да нуным рашемдыме корно нерген каҥашыме.