Кумыл уло – лектышат лийшаш
11.10.2019
Марий Эл вуйлатыше Александр Евстифеев республикын Кугыжаныш Погын председательжын алмаштышыже Наталья Козлова дене вашлиймашым эртарен. Тушто законодательный паша шотышто ончыкылыклан шонымашыж нерген йодын. Наталья Козлова избиратель-влакын ӱшаным ыштымыштлан тауштен да Марий Элыште илыше-влакын илышыштым саемдышаш верч кугу лектыш дене тыршаш ямде улмыж нерген каласен. - Тиде шонымашым сайлан гына шотлыман. Тыгай кумыл нерген чыла избирательлан колаш куанле да, мыйын шонымаште, кажныже полшаш ямде лиеш. Мый тачысе вашлиймаштат, республикын Кугыжаныш Погынжын сессийыштыжат избиратель-влак ончылно отчетым ышташ кӱлмӧ нерген ойленам. Тиде кажне депутатын да вуйлатышын обязанностьшо, - палемден Александр Евстифеев. Кугыжаныш Погын председательын алмаштышыже избиратель-шамыч регионышто лийше вашталтыш-влак нерген палышт да шкештат тушко чолган ушнышт манын шонымаш дене пашажым чоҥаш тӱҥалшашыж нерген палдарен. |