Марий Эл вуйлатыше Юрий Зайцев Курыкмарий районыш миен коштшыжла фермер озанлык дене палыме лийын, тыгак чоҥалтше икмыняр объектым аклен.
Виловат селаште Юрий Зайцев физкультур да тазаҥдыме комплексым ончен. Тиде комплексым финанс условий укелан кӧра чоҥен шуктымо огыл. Кызытеш объект 36 процентлан ямде.
Вара регион вуйлатыше Сумка села велыш шуйналтше корным ыштымым аклен. Тиде селаште Юмынавам Шочыктышо Эн Святой Ава храм, тыгак Юмынаван Почаевский Юмоҥаже лӱмеш памаш-влак улыт. Нуно юмылан ӱшаныше-влакым шкешт деке шупшыт. Ончыкыжым тышке толаш йӧнанрак лиеш.
Тиде корнын кужытшо – 4,7 километр. Тудын лопкытшо куд метр лиеш. Чоҥымо пашалан 443 миллион теҥгем ойырымо. 2022 – 2023 ийлаште кум этап дене чоҥалтеш да 2024 ий шошым ыштен шуктат.
Республикым вуйлатыше Пайскырык селасе фермер озанлыкыште лийын. Тиде озанлык тыглай йыраҥыште пакчасаскам да пареҥгым ончен кушта. Тудлан ялозанлык техникым да оборудованийым налаш кугыжаныш полышым пуымо. Продукцийым шкенан республикыште да пошкудо регионлаште ужала.
Тидын деч вара регионым вуйлатыше Курыкмарий районысо фермер-влак актив дене вашлийын. Тушто агропромышленный комплекслан полышым пуымо нерген мутланыме. 2023 ийыште ялозанлык сатум ыштен налше 61 озанлыклан техникым налаш 130 миллион теҥге субсидийым ойырымо. Тений 129 миллион теҥгем ойыраш палемдыме.
2022 ий гыч ялозанлык пашаеҥ-влаклан кугыжаныш полышым 100 тӱжем теҥге гыч 450 тӱжем теҥге марте кугемдыме. Тыгай полышым налше-влак радамым ешарыме. Нунын коклаште кӱшыл да кокла ялозанлык направлениян специалист, тыгак массовый профессий пашаеҥ-влак улыт.
2024 ийыште республикын бюджетыштыже ялозанлык отрасльлан кадрым ситарыме пашам вияҥдаш 20,8 миллион теҥгем ойырымо.
«Ме ужына: калыкын илыме условийже саемеш, кундем-влак сылнештыт, промышленный предприятий-влакын паша лектышышт кушкеш. Россий президентын тӱҥалтышыж почеш илышыш шыҥдарыме национальный проект ден федерал программе-влак тидлан чот полшат. Кызыт республикыштына 12 национальный проектлан эҥертена. Мемнан задачына –палемдыме чыла мероприятийым шуктымо жапым эскераш», – каласен Юрий Зайцев.
Марий Эл вуйлатышын пресс-службыжын уверже негызеш В.Смоленцев ямдылен
