Марий Эл вуйлатыше Юрий Зайцев Параньга районышто лийын. Тудо нацпроект-влак дене келшышын объектлаште паша кузе шукталтмым ончен лектын.
«Лӱдыкшыдымӧ сай качестван корно» национальный проект почеш, тений Одывлак – Кужэҥер – Параньга автомобиль корнышто ремонт кая. Тудын кужытшо – 11 километрат пеле наре. Пашан тӱрыс акше – 251,2 млн. теҥге.
Асфальт-бетон шартышым вашталтыме деч посна ты корно ужашыште 7 автобус остановкым тӧрлатеныт, корно тӱрыш тыгыде кӱм оптеныт, авыртышым вераҥденыт.
Параньга район администраций вуйлатыше Альфит Ибраев ты кундемыште илыше-влак лӱм дене тиде корно ужашым нацпроектыш пуртымылан Юрий Зайцевлан тауштен.
Марий Эл вуйлатыше палемден: автомобиль корным шотыш кондымо йодышлан кугу тӱткыш ойыралтеш.
Тыгак Параньга поселкышто «Экологий» национальный проект дене келшышын канализацийын очистной сооруженийжым уэмден тӧрлатат. Тудым 1999 ийыште ыштыме деч вара але марте ик ганат капитально олмыктен огытыл улмаш.
Марий Эл вуйлатышылан палдарыме почеш, кызытсе жаплан чоҥымо да монтаж пашам тӱрыс шуктеныт. Лишыл жапыште тудым пашашке колташ ямдылалтыт.
Марий Эл Вуйлатышын администрацийжын информаций паша пӧлкажын уверже негызеш Л.Камалетдинова ямдылен
