Кугу азапыш логалаш огыл манын

И.Комаров CОVID-19 дене черланыме чотым иземдашлан регионлаште ончылгоч шижтарыме мере-влакым пурташ темлымылан тӱткышым ойырен.

«Эн виян йӧн – тӱшка иммунитетым 80 процент кӱкшытыштӧ ышташлан калыкым вакцинироватлыме куатым кугемдымаш, тыгак вакцинацийын пайдалыкше нерген радамын умылтарымаш», – палемден полпред.  

Тылеч посна тудо эмлыме тӧнежлаште санитарно-эпидемиологический йодмаш-влакым пеҥгыдын шукташ кӱлмылан, поснак коронавирусан черле-влакым моло инфекциян (ОРЗ, ОРВИ да грипп) пациент-шамыч деч ойырымылан, шуко еҥ иквереш погынымо верлаште чараклыме мере-влакын шукталтмыштым эскерымылан, койко фондым виктарыме качествым саемдымылан тӱткышым ойыраш каласен.

Марий Элыште у коронавирус инфекций дене кылдалтше сӱрет начаремын толеш. Пытартыш кок арняште койко фондым кугемдыме, стационарлашке палынак шуко черлым эмлалташ пыштат. Черын неле формыж дене орланыше, кислород да ИВЛ полшымо дене шӱлышӧ пациент-влак ончычсо семынак шукын улыт.

Поликлиникылаште пациент-шамычын чотышт кок пачаш кугемын. COVID-19 дене черланыше 25 ий деч самырык еҥ-влакын радамышт кушкын толеш.

Республикын Тазалыкым аралыме министерствыже медицине организаций-влакын койко фонд дене пайдаланымышт шотышто кече еда иктешлымашым ышта.

14 октябрьлан налмаште республикысе медицине организацийлаште 1498 пациент эмлалтеш, пытартыш суткаште стационарлашке 132 черлым пыштыме, 256 еҥ неле состоянийыште, 60 пациент ИВЛ полшымо дене шӱла, 848 черлылан кислород кӱлеш. Медперсонал пеш кугу нагрузко дене пашам ышта.

Калыкым COVID-19 деч умбакыже вакцинироватлат. Теҥгече кече марте прививкым 195416 еҥ ыштыктен, вакцинацийын тичмаш курсшым 185755 граждан эртен.