|
Кугемдаш йӧным мумо
18.02.2020
Кодшо ийын
элыштына экономикыш инвестицийым пыштымаш иземме дене пырляк 20 регионышто тудым
кугемдаш йӧным муыныт. Национальный рейтинг агентствын (НРА) идалык еда эртарен
шогымо шымлымашыже тидым ончыктен.
Агентствын рейтингыштыже шке позицийыштым Калининград, Мурманск, Курск, Астрахань, Челябинск, Вологда, Новгород, Архангельск, Рязань, Тверь, Кемерово, Псков да Иваново область-влак, Пермь, Камчатке да Забайкалье край-влак, Удмуртий, Чечня да Марий Эл республик-влак, тыгак Севастополь саемденыт. Севастополь тыгодым шкешотан рекордым шынден – иканаште кум тошкалтышлан нӧлталтын. Тӱҥ капиталыш инвестиций кушмылан да промышленный производство кугеммылан кӧра регион позицийжым пеҥгыдемден, палемдыме обзорышто. Но тӱҥ инвесторжо кугыжаныш лийын, частный инвестиций регионыш пурен огыл гаяк. Шке позицийыштым йомдарыше регион-влак радамыш Амур ден Омск область-влак, Чукотка АО, Алтай, Мордовий, Коми да Бурятий республик-влак пуреныт. Санкт-Петербургат шке позицийжым йомдарен, а ончыч тудо Москва дене икымше верым пайлен. НРА-н рейтингше регионлам кум тӱшкалан – инвестиций ым савырыме шотышто кӱкшӧ, кокла да икмарда кӱкшытанлан – шелеш. Тидын годым шуко фактор (регионын кушто верланымыже, пӱртӱс поянлык, инфраструктур, кӧргӧ рынке, регионысо бюджетын да предприятий-влакын финанс пеҥгыдылыкышт, экономикын производство потенциалже) шотыш налалтеш. |
Кугемдаш йӧным мумо
