Марий Эл вуйлатыше Ю.Зайцев республикысе школ-влакым 2024 ийыште капитально олмыктымо йодыш дене кылдалтше заседанийым эртарен.
Республикысе Образований да науко министр Л.Ревуцкая РФ Просвещений министерстве тиде пашалан 525 миллион теҥгем ойырен манын палемден.
Тений тыгай школ-влак капитально олмыкталтыт:
1-ше номеран Красногорский кыдалаш общеобразовательный;
Савино селасе школ-интернат;
Руэмысе кыдалаш общеобразовательный;
Козьмодемьянск оласе кумшо номеран кыдалаш общеобразовательный:
Арде селасе кыдалаш общеобразовательный;
Пӧтъял селасе кыдалаш общеобразовательный.
Лишыл жапыште подрядный организацийым ойырымо шотышто конкурс эрта.
Марий Эл вуйлатышын палемдымыж почеш олмыктымо пашам жапыштыже тӱҥалман, молан манаш гын сентябрьыште йоча-шамыч уэмдыме, чыла шотыштат йӧнан классыш толын пурышаш улыт.
Марий Эл Республикым вуйлатышын администрацийжын информаций
паша пӧлкажын уверже негызеш Л.ШАБДАРОВА ямдылен