Марий Эл вуйлатыше Юрий Зайцев Кокшайск селаште у амбулаторийым почын.
Амбулаторий ты селаште, тыгак тудын воктене верланыше Шемшӱргӧ, Ялпай, Семеновко яллаште да Таир ден Шуйка посёлкылаште илыше калыкым обслуживатлаш тӱҥалеш. Тудо 1,5 тӱжем еҥым авалтышаш.
229 квадрат кумдыкан у оралтым «Здравоохранений» национальный проектын первичный звеножым модернизироватлымаш» федерал программе дене келшышын нӧлтымӧ. Апрельыште чоҥаш тӱҥалыныт, а июльышто амбулаторийын эше 1985 ийыштак чоҥымо тошто оралтыжым ронченыт.
«У ий вашеш тыгай торжественный событий эрта. Аварийный объект олмышто у амбулаторийым нӧлтенна. Тысе куд илемыште илыше 1518 еҥ ынде медицине полышым налаш тӱҥалеш. Нуным эн ончыч тергашак ты объект моткоч кӱлешан», – палемден регион вуйлатыше.
Юрий Зайцев терапевтын, стоматологын кабинетыштым, аптечный пунктым ончен савырнен. Тыште тыгак педиатрын, гинекологын, физиотерапевтын, прививкым да процедурым ыштыме кабинет-влак, регистратур да моло пӧлем улыт.
Первичный звеном модернизироватлыме программе почешак кодшо ийын ты амбулаторийлан Лада Ларгус автомашинам ойырымо. Тидыже мӱндыр яллаште илыше-влакым тергаш да Звениговыш аҥысыр специалист-влак деке кондештараш, анализ ден шымылымашым траспортироватлаш йӧным почын.
Марий Элын бюджетше гыч ойырымо окса кӱшеш Кокшайскысе амбулаторийыште аптекымат почаш йӧн лектын. Вес ийын январь гыч тудо пашам ышташ тӱҥалеш. Тушто эм препарат-влакым ужалаш тӱҥалыт.
Юрий Зайцев Кокшайскыште илыше калыкым шушаш У ий дене саламлен да шке тазалыкым аралаш тыланен.
Звенигово район администрацийым вуйлатыше Сергей Петров тысе калыкын лӱмжӧ дене регион вуйлатышылан, Марий Эл правительствылан районлан чыла шотыштат полшен шогымылан тауштен.
Марий Эл Республикым вуйлатышын администрацийжын информаций паша пӧлкажын уверже негызеш С.Носова ямдылен
