Россий Федераций президентын Юл кундем федерал округышто полномочный представительже Игорь Комаров ден Марий Элым вуйлатышын пашажым жаплан шуктышо Юрий Зайцев Йошкар-Олаште Креатив индустрий школышто лийыныт.
Элыштына тенийысе тунемме идалык гыч тыгай тунемме верым 32 регионышто почмо. Тиде пашалан федерал бюджет гыч 44 миллионым да регионысо гыч 36 миллион утла теҥгем ойырымо. Марий Элыште Креатив индустрий школ И.С.Палантай лӱмеш тӱвыра да сымыктыш колледж пелен почылтын. Марий Эл тӱвыра, савыктыш да калык-влакын пашашт шотышто министр Константин Ивановын каласкалымыж почеш, чылаже куд студий уло: звукорежиссур да электрон музык, анимаций, фото- да видеопроизводство, дизайн, цифран интерактивный технологий-влак. Тидын деч посна цифран производство модуль, креатив кумдык, изи рекреаций, кабинет-шамыч улыт. Тыгай направленийла дене занятий-влак лийыт: проект да ончер паша, PR да маркетинг, арт-дисциплине, актёр мастарлык, тӱвырасе виктем. Тунемме план кок ийлан ышталтеш, 2022-2023 ийлан Креатив индустрий школышто 120 еҥ шинчымашым погаш тӱҥалеш. Приём умбакыже шуйна, молан манаш гын тунемаш кумылан-влак шукын улыт.
Константин Ивановын увертарымыж почеш, 30 августлан чыла пӧлемым олмыктымо, мебельым да кызытсе жаплан келшыше аппаратурым вераҥдыме.
Марий Элым вуйлатышын пашажым жаплан шуктышо ден Россий Федераций президентын Юл кундем федерал округышто полпредшылан у креатив кумдыкышто визуализаций ӱзгар-шамычым кучылтмым ончыктеныт: нуныжо варажым кеч-могай сферыштат (инженерийыште, медициныште, да моло областьлаште) пайдале лийыт.
Игорь Комаров регионышто йоча-влакын моштымашыштым вияҥдаш да нунылан ешартыш образованийым налаш инфраструктурым ыштымым кӱкшын аклен. «Направлений-шамыч кызытсе жапын йодмыжлан келшыше улыт. Лектышым ончалаш оҥай ыле. Сеҥымашым тыланем», – каласен тудо.
Марий Эл Республикым вуйлатышын организаций да аналитике виктемжын уверже-влак негызеш Г.Кожевникова ямдылен
