18 январьыште Марий Элым вуйлатыше Юрий Зайцев «Российын кӱртньыгорныжо» ОАО-н филиалжылан шотлалтше Горьковский кӱртньыгорнын начальникше Сергей Дорофеевский дене вашлийын.
Юрий Зайцев республик кундемыште кӱртньыгорнын пашаж дене кылдалтше йодышла дене вашмутланымашым умбакыже шуяш да пырля пашам ышташ ямде улмым ончыктен. Сергей Дорофеевский республик правительствын кӱртньыгорно сообщенийым вияҥдыме йодышлан тӱткышым ойырымыжлан Марий Элым вуйлатышылан тауштен да тиде пашаште регионын вий-куатше ситышын улмым палемден.
2022 ийыште пригородный поезд дене коштшо пассажир-влакын чотышт 18 тӱжем да тораш коштшо поезд дене пайдаланыше еҥ-влакын чотышт 113 тӱжем марте кушкын. Тылеч ончычсо ий дене таҥастарымаште пассажир йогын келшен толшын 25 да 37 процентлан кушкын.
Вес регионлашке посна кечылаште коштшо ешартыш вагон-влак шотышто прогноз чыныш лектын. Российыште эл кӧргӧ туризм вияҥмылан кӧра республикын рӱдолашкыже турист поезд-влакын толын коштмышт калыклан келшен.
Вашлиймашлаште ондак тарватыме йодыш-влакым тӧрлымо, вокзалымат тачысе кечылан келшышым ыштыме, палемден Сергей Дорофеевский.
Мутланыме годым пригородный кӱртньыгорно транспортын пашам ыштыме жапым шуйымо нерген йодышым нӧлталме. Кызыт теле жапыште пригородный поезд-влак огыт кошт, но йодмаш улмылан кӧра ты йодышым каҥашаш палемдыме.
2022 ийыште грузым шупшыктымо кугыт иземын. Тений тудым «Балчуг-Петролеум – МНПЗ» ООО-н нефтепереработко продукцийжым шупшыкташ тӱҥалмылан кӧра ешарен кертына, шонем, каласен кӱртньыгорно начальник. Тиде предприятий тений 5 январьыште пашам ышташ тҥалын.
Марий Элын правительствыже кӱртньыгорно транспортын услугыжым утларак йӧнаным да сай качестваным ыштымашке виктаралтше пашам шуктен шога. Тыште эн кӱлешан йодышлан кӱртньыгорнышто лӱдыкшыдымылык йодыш шотлалтеш каласен Юрий Зайцев.
«Пассажир-влакын лӱдыкшыдымылыкышт – мемнан тӱшка пашана, ме тидлан йӧным ыштышаш улына»,– иктешлен каласен Марий Элым вуйлатыше.
Марий Эл вуйлатышын администрацийжын
информаций паша пӧлкажын уверже негызеш П.Шакиров ямдылен
