Профессионал пайремышт вашеш эртыше торжественный мероприятийыште Марий Эл вуйлатыше Юрий Зайцев корно отрасль пашаеҥ ден ветеран-шамычым саламлен.
Тудо палемден:
– Тендан профссионализмда ден келшен пашам ыштымыдалан лийын республикыштына лу да шӱдӧ дене километр кужыт корныш у шартыш пышталтеш. Эше вич ий ончыч окса ситыдымылан кӧра корнын нормативный состоянийлан келшен толмыж шотышто республик пытартыш верыште лийын. Кызыт ты шотышто ме ончыл радамыште улына. Тидыже федеральный бюджет гыч ешарен ойырымо 6 миллиард утла теҥгем кучылташ йӧным ыштен.
Регион вуйлатышын ойлымыж почеш, калыклан автомобиль корнын келшымыже шотышто Марий Эл топ-10 регион-лидер-влак коклашке пура. Ме 6-шо верыште улына.
Республик вуйлатыше корно отрасльыште тыршыше-влаклан профессионализмыштлан, ветеран-шамычлан кугу опытыштлан тауштен.
– Корно озанлык верыште огеш шого. Тудо эре вияҥеш. Сандене ончыко ӱшанлын ончыза. Мый тыланда у кӱкшытыш шуаш, тыгак пеҥгыде тазалыкым, еш пиалым, тыныслыкым, тӱҥалме кеч-могай пашаште лектышым да шочмо элнан кугешнен кертме йӱлам умбакыже шуяш тыленам, – каласен Юрий Зайцев. Да ешарен: корно илыме верлам веле огыл, тыгак еҥ-шамычымат ушат.
Пытартышлан Марий Эл вуйлатыше корно отрасльыште тыршыше ойыртемалтше пашаеҥ-влаклан тӱрлӧ кӱкшытан наградым кучыктен.
Марий Эл Вуйлатышын администрацийжын информаций паша пӧлкажын уверже негызеш Л.Камалетдинова ямдылен
