Конституцийыш вашталтышым пуртымо верч

Сессийыште регион вуйлатыше Александр Евстифеев лийын. Депутат-влак РФ Конституцийыш вашталтышым пуртымо шотышто «Публичный властьым ыштыме да тудын пашаж дене кылдалтше посна йодышлам тӧрлымашым саемдыме нерген» РФ законым сайлан шотлышт. Ты йодышым  йӱклымашыш лукмо деч ончыч документым Кугыжаныш Погынын чыла комитетыштыже ончылгоч ончен лекме да сайлан шотлымо манын палемдыш законодательство шотышто комитет председатель А.Павлов.

Йӱклымаш тӱҥалме деч ончыч РФ Федеральный Погынымашын Федеральный Советшын членже, Россий парламентын Кӱшыл палатыштыже Марий Эл деч еҥ К.Косачёв депутат-влак ончылно каласыш:

– Россий Президентын Конституцийыш темлыме вашталтышыж дене келшыме шот дене Россий Федераций субъект-влакын законым лукшо органышт деч Федераций Советыш ой-влак пураш тӱҥалыныт. А тидыже тачысе кечылан ик эн тӱҥ уверлан шотлалтеш. Кызыт Кугыжаныш Погынышто эртыше мутланымаш да тендан ойда федерал кӱкшытыштӧ пеҥгыдемдыме дене келшен толыт. Элнан пӱрымашыжым икмыняр лу ийлан ончык рашемдаш полша. Тӧрлатымашан вашталтышым пурташак кӱлмым шотыш налын, тендан кокла гыч кажныжым йӱклымашыш ответственно ушнаш йодам.