Руш Кукмор ялыште «Семеновский» племзаводын республикыште ушкал ашныме кокымшо робот фермыже почылтеш. Тудын куатшым регионым вуйлатышын пашажым жаплан шуктышо Юрий Зайцев аклен.
Племзаводын генеральный директоржо Александр Козырев увертарен: инвестиций проектын кумшо черет кышкарыштыже 420 ушкаллан робот фермым, тыгак 180 презым ашнаш вӱтам да силос аралыме кок вынемым чоҥымо паша мучашке лишемеш. Фермым чоҥаш 236 миллион теҥге инвестиций оксам кучылтмо. Тышечын 180 миллионжо – чоҥымо да монтаж пашалан, 56 миллионжо – оборудованийым налаш. Чыла тидым илышыш шыҥдараш республикым социально-экономически вияҥдыме программе полшен. Тичмаш налмаште тиде ийын вольык ашныме объект-влакым да оборудованийым налаш 350 миллион теҥге инвестиций кучылталтеш.
Фермым проект куатышке лукмеке, предприятийын ушкал кӱтӱжо 400 вуйлан ешаралтеш да 4,3 тӱжемыш шуэш. Тыгодым кече еда 15 тонн ешартыш шӧрым ужалаш йӧн лектеш. Тыгак ешартыш паша вер ышталтеш.
– Ушкал мыняр шона, тунар мала, кочкеш да йӱеш. Чыла тидым вольыкын капышкыже вераҥдыме датчик увертара. Компьютер ушкаллан кунам лӱштыкташ каяш кӱлмым шижтара да вольык компьютер деке лишемеш. Ушкал-влак, айдеме семынак, пашаче да його лийыт, сандене южыжым покташ кӱлеш. Лӱштыш мыняр лекмым шотыш налын, ушкаллан автомат комбикормам пуа. Икымше робот фермыжымат тиде предприятийыштак кок ий ончыч чоҥымо ыле.
«Семеновский» племзаводын генеральный директоржо ешарен: предприятий республикыште шӧрым ыштен налме шотышто ончыл верым куча, инноваций технологийым шыҥдарымылан да оборудованийым уэмдымылан кӧра ий еда лӱштышым кугемден толеш. Робот ферме деч посна 25 миллион теҥгелан родильный отделений да Азаново селаште кормоцех чоҥалтыт. Шернур районысо Кугэҥер ялыште 42 миллион теҥгелан 330 веран презе ашныме кок вӱтам нӧлтат. Кумыс фермыште кок вӱтам пужен ыштат, а Советский районысо Михайловка ялыште презе ашныме ик вӱта чоҥалтеш, эше иктым ачалат.
Марий Эл Республикым вуйлатышын организаций да аналитике виктемжын уверже негызеш В.СМОЛЕНЦЕВ ямдылен
