«Демографий» национальный проектын «Паша верым ситараш полшымаш» федеральный проектшым илышыш пуртымо кышкарыште Йошкар-Олаште калыклан паша верым ситарыме службо кызытсе жаплан келшыше рӱдерыш савырнен. Тушко 3 августышто Марий Элым вуйлатышын пашажым жаплан шуктышо Юрий Зайцев миен коштын.
Тудо куснылшо офис – калыклан услугым ыштыше специальный микроавтобус – ден Йошкар-Оласе калыклан паша верым ситарыме рӱдерым ончен. Кокымшыжын кӧргыжым тичмашнек уэмдыме: обслуживатлыме помещений ден цифровой сервисын кумдыкшым палынак йӧнаным ыштыме, клиент-шамычын йогыныштым шеледыме, электрон черетын системыжым шыҥдарыме. Инвалид-влаклан пурен-лекташ лӱмынак омсам ойырымо. Тылеч посна рӱдерым уэмден олмыктымо годым кажне еҥ дене пашам посна ыштыме принципым пуртымо, да ынде гражданин келшыше пашам личный карьерный консультант дене пырля кычалын кертеш. Клиент-влаклан компьютер технике дене пайдаланаш йӧным ыштыме, йоча-шамычлан посна кумдыкым келыштарыме.
Ю.Зайцев чыла тидым сай велым аклен.
«Кадровый центр Работа России» пилотный проектым илышыш пуртымо кышкарыште Йошкар-Оласе кадр рӱдер кокымшо лийын да республикыштына эн кугулан шотлалтеш. Ончыкыжым тыгай шотан рӱдер-влакым Медведево ден Звенигово районлаште почыт.
Марий Эл Республикым вуйлатышын организаций да аналитике виктемыжын уверже негызеш М.ИВАНОВА ямдылен
