Марий Эл вуйлатышын пашажым жаплан шуктышо Юрий Зайцев ден Угарман областьысе губернатор Глеб Никитин туризм сферыште пырля проект-влакым илышыш шындарыме шотышто ойпидышыш кидпалыштым пыштеныт.
Эн ончыч нуно Юринысе Шереметьев замкым пырля вияҥдынешт. Тидлан Угарман вуйлатыше лӱмын посёлкыш толын, пырля замкым ончен лектыныт. Вара ойпидышым ыштеныт. Пытартыш жапыште тушко утларак турист толаш тӱҥалын. Тидыже Нижний Новгород гыч Юриныш «Валдай» круиз лайнерын маршрутшым почмо денат кылдалтын. У ойпидыш турпотокым кугемдаш веле огыл полшышаш. Тыгак шке замкыштыже Шереметьевмыт ешын коллекцийже дене палдарыше ончерым почаш йӧным лектеш, молан манаш гын тудо кызыт Угарманысе да Марий Элысе моло тоштерлаште аралалтеш. Угарманыште – 1200 наре арвер. Нуным ты лӱмло еш 300 ий наре чумырен. Марий Элысе тошерлаште – 350 наре.
– Кокла курымласе замок да Юл эҥер... Ты моторлыкым аклаш кӱлеш. Шонымашна шукталтеш гын, ме ты верым эҥер мучко кошшто турист-влакын культовый верышкышт савырен кертына, - каласен Ю.Зайцев.
– Мый Юрий Викторвич дене тӱрыс келшем. Ты замок уло элнан поянлыкше, сандене тудым уэмдаш федерал проект лийшаш. Ӱшанем Марий Эл вуйлатышылан, да пашаштыже сай лектышым тыланем. Пошкудо семын тудлан полшаш эре ямде улына, – палемден Глеб Никитин.
Марий Эл вуйлатышын Организаций да аналитике виктемжын уверже негызеш С.Носова ямдылен
