Россий парламентын кӱшыл палатыжын председательже Валентина Матвиенко Китай Коммунистический партийын Ляонин провинцийысе комитетшын секретарьже, Ляонин провинцийысе калык представитель-влакын погынымашыштын Постоянный комитетшын председательже Хао Пэн дене вашлиймашым эртарен.
Тиде мероприятийыште Марий Элым вуйлатыше Юрий Зайцев ден Федераций Совет председательын алмаштышыже Константин Косачев лийыныт.
Валентина Матвиенко тыге увертарен: вашлиймаш Российын президентше Владимир Путинын Китай Калык Республикыш визит дене кайымыж вашеш эртаралтеш. Кугыжанышым вуйлатыше тушто «Один пояс – один путь» кумшо тӱнямбал форумышто участвоватлаш тӱҥалеш.
«Шушаш вашлиймаш, мутат уке, талукын кокымшо пелыштыже Россий ден Китай коклаште кылым кучымаште тӱҥ событийыш савырна, мемнан элна-влак коклаште практический кыл кучымашым вияҥден колташ чот полша»,– палемден Федераций Совет председатель.
Валентина Матвиенкон мутшо почеш, кызыт Россий ден Китай кокласе кылым вияҥдымылан, Россий Федерацийын субъектше ден КНР-ын провинцийже-влак кӱкшытыштӧ пырля пашам ыштыме кылым пеҥгыдемдыме йодышлан пеш кугу тӱткыш ойыралтеш.
Мутлан, Марий Эл Республик Китайын регионжо дене сайын пырля пашам ышта. Кыл икмяняр корно дене вияҥын толеш. Тидын нерген регионым вуйлатыше Юрий Зайцев радамлын каласкален. Тудо промышленность, образований, туризм да культур сферыште пырля пашам ыштыме план нерген ойлен.
Марий Элым вуйлатышын мутшо почеш, тений кеҥежым Федераций Советын делегацийжын составыштыже Китайыш визит дене миен коштмаш регион-влак кокласе кылым вияҥден колташ сай шӱкалтышым ыштен. Тылеч вара Москваште китай партнёр-влак дене пайдале переговорым эртарыме, тыгодым ятыр йодышым радамлын каҥашыме.
Юрий Зайцев республик китай парнёр-влак дене внешнеэкономический кылым умбакыже пеҥгыдемдаш кумылан манын палемден.
Марий Эл Республикым вуйлатышын администрацийжын информаций паша пӧлкажын уверже негызеш П.Шакиров ямдылен
