|
Келшен пашам ыштымын лектышыжат сай
04.02.2020
Марий
Элын прокуратуржо кодшо ийысе пашажым иктешлен. Кумдаҥдыме заседанийыште Марий
Эл вуйлатыше Александр Евстифеев лийын.
Республикын прокуроржо Сергей Беляковын палдарымыж почеш, ӱмаште чылаже 140 млн. теҥге пашадар парымым пӧртылтеныт. Нунын тыршымышт дене нацпроект-влак дене кылдалтше мероприятий-шамыч илышыш жапыштыже пурталтыныт. Кугу Отечественный сарын ветеранже-влакын праваштым аралыме йодыш-шамычат эреак контрольышто лийыныт. Тыгак ийготыш шудымо-влакын праваштым, тунеммышт годым илышыштым да тазалыкыштым аралыме шотышто законодательстве кузе шукталтмым эскереныт. Калык-влак кокласе кыллан, экстремизм ден терроризм ваштареш кучедалмылан кугу тӱткыш ойыралтын. Сергей Беляков прокурор-влаклан калык да мер организаций-влак дене пеҥгыде кылым ышташ, «Эфир Генеральной прокуратуры Российской Федерации» увер-коммуникаций видеосервислан материал-влакым ямдылымашке чолган ушнаш темлен. Марий Эл вуйлатыше регионышто мер-политике ситуаций сай улмаште кугыжаныш кучем ден республикын прокуратуржын пашам ваш мутланен келшен ыштымыштым палемден да ончыкыжымат, мутлан, нацпроект-влакым илышыш пуртымо да Марий Эллан 100 ий теммылан пӧлеклалтше мероприятий-влакым эртарыме годым тыгак тыршаш темлен. |
Келшен пашам ыштымын лектышыжат сай
