Тений кеҥежым республикыштына ола воктене верланыше йоча лагерьлаште чылаже 22 тӱжем икшывылан (тышеч 11 тӱжемже илышыште нелылыкыш логаше-влакын радамышкышт пурат) канаш да тазалыкым пеҥгыдемдаш йӧн ышталтын. Начар тазалыкан ӱдыр-рвезе-шамычымат ӧрдыжеш кодымо огыл: 300 утла инвалид йочалан верым ойырымо.
Тазалыкым пеҥгыдемдыме кампаний шотышто Марий Элым вуйлатышын пашажым жаплан шуктышо Юрий Зайцевын эртарыме черетан оперативный заседанийыштыже республикын образований да науко министрже Лариса Ревуцкая каласкален.
Тудын палемдымыж почеш, тений кеҥежым регионышто йоча-влаклан 196 организаций пашам ышташ тӱҥалеш. Республикын бюджетше гыч ойырымо средствалан кӧра кум кугыжаныш тунемме верыште чумыр налмаште 160 икшывылан профилян лагерьым почмо. «Ола воктене верланыше лу лагерь кешбэк дене кылдалтше федерал программыш пурталтыныт. Тидлан кӧра шукырак йочам авалташ йӧн лийын. 20 июньлан чылаже 5945 путёвкым ужалыме, тышеч 3569-же – «Йоча кешбэк», – каласен министр.
Ведомствым вуйлатыше ӱшандарен: республикыште верланыше чыла йоча лагерьыште лӱдыкшыдымылык шотышто мероприятийым эртарыме. Марий Элым вуйлатышын пашажым жаплан шуктышо тазалыкым пеҥгыдемдыме кампаний жапыште шукырак икшывым, ийготыш шудымо-влакым да тунемше молодёжьым авалташ кӱштен, вет яра коштшо-шамыч вучыдымо эҥгекыш вашке логалын кертыт.
Министрын ойлымыж почеш, тиде паша ышталтеш: верлаште экологий отрядлам чумыраш, ӱдыр-рвезе-влакым школ лесничествылаш кошташ але волонтёр лияш кумылаҥдаш, олмыктымо бригадылам погаш, тӱвыра тӧнеж пелен группым почаш да моло йӧным кычалаш, тыге 7 гыч 18 ияш марте 47 тӱжем тунемшым авалташ палемдыме.
Совещанийыште посна йодыш семын самырык-влакын пашам ыштымышт шотышто каҥашеныт. Паша да паша вер шотышто департаментым вуйлатыше Александр Лазаревын ойлымыж почеш, молодёжь коклаште пашадыме-влакын чотыштым иземдаш манын, республикын Правительствыже кужу жаплан (2030 ий марте) программым ямдылен. Тудын шонымашыже – самырык-влаклан профессионал мастарлыкыштым илышыште кучылташ йӧным ышташ.
Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен
