Кажныже ушнышашак

15 октябрьыште Калык перепись тӱҥалын. Эпидемийлан кора тудым кок гана кусарышт. Теве ынде вучен шуктышна. Ты кечынак Маристатыште онлайн йӧн дене Ростатын переписьлан пӧлеклалтше торжественный презентацийже эртыш. А кодшо изарнян Марий Элыште Калык переписьым ямдылен да эртарен колтымо шотышто республиканский комиссийын черетан заседанийже эртен. Тудым Марий Эл правительстве председательын икымше алмаштышыже Михаил Васютин вӱден.

2020 ийыште эртараш палемдыме перепись тений 15 октябрь гыч 14 ноябрь гутлаште лиеш. Заседанийыште переписьлан ямдылалтме пашам иктешленыт,  ыштен шуктыдымо йодыш-влакым рашемденыт. Маристатын вуйлатышыжын пашажым жаплан шуктышо Инна Петрова тидын дене палдарен. Тӱҥ шотышто Российым ик тылзылан авалтыше кампанийлан ямде улына. Переписной персоналымат ситарыме, туныктен лукмо.

Каласен кодыман, тиде перепись годым пытартыш гана вашмут-влакым кагазыш  да икымше гана электрон йӧн дене серат. Сандене, поснак кызытсе неле эпидемий жапыште, пытартышыже йӧнан. Переписьым онлайн-йӧн дене «Госуслуги» портал гоч эрташ лиеш. А пачерыш але суртыш толшо переписчиклан кӱар кодым (QR) гына каласыман. Тыгак телефон денат чыла йодышлан вашешташ лиеш.  Мутат уке, тидыже перписчикынат пашажым мыняр гынат куштылемда. Кугыжаныш кучемын да Госкомстатын пашаеҥже-влакым икте гына тургыжландара: тыглай граждан-влак калык переписьын мемнан ончыкылан кӱлешлыкшым умылен, ты кампанийыш ушныштак ыле. А тыгак лийже манын, кугыжаныш кучем чыла йӧным кучылтеш. Шушаш тылзе жапыште Интернет йӧн дене пайдаланен, переписьым утларак еҥ эртен кертше манын, МФЦ рӱдерлаште веле огыл,  моло социальный учрежденийлаштат йӧным ыштат. Волонтёр-влакат тыгай пунктлашке толшо-влаклан полшаш тӱҥалыт.