Марий Элым вуйлатышын пашажым жаплан шуктышо Юрий Зайцев Руш Кукмор тӱвыра рӱдерлан оборудованийым налаш средствам ойыраш палемден.
«Тӱвыра» национальный проект кышкарыште рӱдерын оралтыжым ачалыме паша мучашке лишемеш. Чумыр паша кугыт – 18 миллион теҥге. Тӱвыра, савыктыш да калык-влакын пашашт шотышто министр Константин Иванов палемден: фасад ден леведышым ачалыме, окна ден омсам, пожарный водопровод системым, йӱштӧ вӱд, канализаций, ырыктыме пучым вашталтыме, пӧлем-влакым олмыктымо. Чумыр пашам октябрь марте мучашлаш лийме.16 октябрьыште уэмдыме тӱвыра рӱдерын сценыштыже «Йӱксӧ ер» балетым ончыктат. Юрий Зайцев чумыр паша кузе кайымым ончен савырнен.
– Ик йодыш гына кодеш – мебельым налаш, – ойлен Константин Иванов.
Республикым жаплан вуйлатыше Юрий Зайцев ешарен: мебельым налаш средства ойыралтеш.
Тӱвыра, савыктыш да калык-влакын пашашт шотышто министр тыге палемден: вес ийлан актовый залым ачалат. Тыште кинотеатр лиеш. Тидлан 5 миллион теҥге федерал окса колталтеш.
Марий Эл Республикым вуйлатышын организаций да аналитике виктемжын уверже негызеш В.СМОЛЕНЦЕВ ямдылен
