Йошкар-Оласе «Восточный» микрорайонышто 1100 веран школым чоҥымо паша умбакыже шуйна. Марий Элым вуйлатыше Юрий Зайцев тиде кечылаште эртыше совещанийыште палемден: тунемме вер тений 2024 ий 15 августлан ямде лийшаш да 1 сентябрьлан шке омсажым почшаш.
Республикын образований да науко министрже Лариса Ревуцкаян увертарымыж почеш, 2023 ий гыч Россий Просвещений министерствын темлымашыже тыгай: тунемме объектым чоҥымо дене пырля шинчымашым пуымо кумдыкат жаплан келшышын уэмдалтшаш. «Восточный» микрорайонысо школышто тӱҥ паша мучашлалтын, кызыт оборудованийым да мебельым налме шотышто списке ышталтеш да проект-смете документацийыш кӱлеш вашталтыш пурталтеш.
Марий Элым вуйлатыше палемден: тиде кундемыште шуко еҥ ила, сандене тунемме вер моткоч кӱлешан.
Марий Эл вуйлатышын пресс-службыжын уверже негызеш Г.Кожевникова ямдылен
