|
Калык йочасадым, школым вуча
18.02.2020
Тений Медведево райрӱдыштӧ 825 веран школым чоҥаш
тӱҥалыт. Тидын нерген Марий Элым вуйлатыше Александр Евстифеев тушко паша дене
мийымыж годым увертарен.
У общеобразовательный организаций Киров уремыште чоҥалтшаш. Кызыт тудо кундемыште 320 веран йочасадым чоҥымо паша мучашлалтеш, регионым вуйлатыше ты объектымат ончен лектын. Тиде кечынак Александр Евстифеев «Феррони» предприятийыште лийын. Тушто ик эн ончыл йот производитель-влакын у технологийышт почеш кӱртньӧ омсам ыштат. Вуйлатыше Александр Лаптевын мутшо почеш, завод шке сатуж дене тӱнямбалне – визымше, а Российыште – икымше верыште. Тыглай омса деч посна предприятий йӱштым, тыгак тулым чытыше омсам ыштен луктеш. Тудын сатужо Калининградыште, Санкт-Петербургышто, Москваште, Краснодарыште, Владивостокышто да моло олалаште, лишыл йот эллаште ужалалтеш. Суткаште пашаеҥ-влак 5,5 тӱжем омсам ыштен луктыт, чумыр налмаште ӱмаште 965 тӱжемым ямдыленыт, а тенийлан 1 миллион 122 тӱжемым палемдыме. Таче заводышто кок тӱжем наре еҥ тырша, кокла пашадар – 35 тӱжем утла теҥге. Ты кечынак регионым вуйлатыше Медведевысе историко-художественный тоштерыште лийын. Тушто 12 тӱжем утла экспонат аралалтеш. Тоштерым вуйлатыше Л.Иванован мутшо почеш, идалык мучко 15 тӱжем еҥ толеш. «Район писын вияҥеш. Тыгак лийшаш, вет тудо рӱдола воктене верланен. Калык йочасад гай социальный объект-влакым вуча. Таче ме у кугу школлан верым палемденна. Ончыкылык нерген шонышаш улына, тиде – вуйлатыше-влакын задачыже», – каласен Александр Евстифеев. |
Калык йочасадым, школым вуча
