Марий Элым вуйлатыше Звенигово районышто социальный объект-влакым ончен савырнен
Юрий Зайцев Звенигово районысо рӱдӧ больницын поликлиникыштыже капитально олмыктымо пашам аклен.
Зданийыште кӧргӧ отделкым уэмдыме, окна ден омса-влакым, инженер коммуникацийым вашталтыме, у мебельым шындыме. Ремонтым «Здравоохраненийын первичный звеножым модернизироватлымаш» регионысо проектын кышкарыштыже ыштыме.
Медицине тӧнежыш 12,8 тӱжем еҥым пеҥгыдемдыме, поликлинике ик сменыште 500 еҥым приниматлент кертеш. Тыште вич терапевтический да кум педиатрический участке пашам ышта. Медицине полышым 16 специальность дене 21 врач пуа.
«Здравоохранений» нацпроектын тазалык аралтыш системын первичный звеножым модернизироватлыме программыже калыклан медицине полышым пуымо качестве ден йӧным кугемдымашке виктаралтын, палемден Ю.Зайцев да тиде пашам Россий Федераций президентын кӱштымыж почеш, тыгак федеральный рӱдерын полшымыж дене ончыкыжат шукташ тӱҥалме нерген ойлен.
Республикым вуйлатыше тыгак Чоҥымо гипс заводышто лийын, предприятийын паша радамжым ончен да коллектив дене мутланен.
Завод чоҥымо тӱрлӧ материалым ямдылен луктеш. 2019 ийыште тудым республик правительстве ден КНАУФ компаний кокласе келшыкын кышкарыштыже уэмден олмыктымо – тиде производствым КНАУФ тӱнямбал группын стандартышкыже нӧлталаш йӧным ыштен. Сырьём приниматлыме пунктым ыштышашлан Юл эҥерысе вӱдлукын серыштыже причалым чоҥымо.
Производствын куатше идалыкыште 84 тонн чоҥымо кукшо да 82 тонн гипсан пижедылше вартышым ямдылен лукташ сита.
Предприятийыш 360 миллион теҥгеаш инвестицийым ыштыме.
Завод, экономике дене кылдалтше санкций-влакым шотыш налде, икшырымын пашам ышта, палемден Ю.Зайцев. Мутшо почеш, йот компаний-шамычын элна гыч кайымышт годым шке производствым вияҥдаш кӱлешан.
Регионым вуйлатыше Красногорский каныме да тӱвыра рӱдерым олмыктымо паша лектышымат ончен. Ю.Зайцевын кӱштымыж почеш, зданийым ачалаш 20 миллион наре теҥгем ойырымо.
Звенигово районыш паша дене миен коштмыжым иктешлыме шот дене Ю.Зайцев совещанийым эртарен. Тушто граждан-влакым аварий лийын кертме лӱдыкшан илыме вер гыч кусарыме, тӱвыра да образований, илыме-коммунал озанлык объектлам чоҥымо йодыш-влакым каҥашеныт.
Марий Элым вуйлатышын пресс-службыжын уверже негызеш М. Иванова ямдылен
