Россий Федераций Просвещений министр Марий Эл правительствынан «Образований» национальный проектым илышыш пуртымо пашажлан кӱкшӧ акым пуэн.
23 октябрьыште Марий Эл Республикын кечыжым палемдыме кышкарыште Россий Федераций просвещений министр Сергей Кравцов регионым вуйлатыше Юрий Зайцев дене вашлийын.
««Образований» национальный проектыште Россий Федераций президентын шындыме чыла задачыже решатлалтеш. Педагог-влаклан пашадар жапыштыже тӱлалтеш, тӱҥалтыш класслаште тунемше-шамычлан шокшо кочкышым пукшат, школ ден йочасад-влак чоҥалтыт. Юрий Викторович, образований системылан тӱткышым ойырымыланда тауштем. Ме тыланда кӱлеш полышым пуаш ямде улына», – каласен Сергей Кравцов.
Марий Элым вуйлатыше тудлан тауштен да палемден: Республикын кечыже – мемнан кундемлан кугу событий, тудо кызытсе жаплан келшыше йодышлам решатлаш йӧным ышта.
«Мемнан пашалан кӱкшӧ акым пуымыланда тау тыланда, Сергей Сергеевич. Федераций Советыште тиде вашлиймашым эртараш йӧным ыштымылан Валентина Ивановна Матвиенколан тауштем. Россий Федераций Просвещений министерстве проблемына-шамычым умыла, ме пырля нуным решатлаш йӧным муына манын шонем», – каласен Юрий Зайцев.
Вашлиймаш лектышан лийын. Марий Эл 2024-2026 ийлан ола деч ӧрдыжсӧ лагерьлаште куштылго конструкцийым чоҥымо, тыгак пищеблок ден медицине пунктлам олмыктымо шотышто Россий Федераций Просвещений министерствын идалык мучко шукталтше программышкыже пурталтын. Тидын деч посна Сергей Крвцов республикысе школ-влакым чоҥен шукташ кӱлеш полышым пуаш решенийым луктын.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен
