13 октябрьыште Москваште Россий Федерацийын чоҥымо паша да илыме вер ден коммунал озанлык министр Ирек Файзуллин ден Марий Эл вуйлатыше Юрий Зайцевын паша вашлиймашышт лийын.
Нуно «Стимул» программе дене келшышын илыме верым да инфраструктурым чоҥымо йодышым каҥашеныт. Министр палемден: программе регион-влаклан социальный объектлам еҥ-шамычлан пайдаланаш йӧнаным ышташ, илыме вер дене кылдалтше проект-влакым писынрак илышыш пурташ, у инфраструктурым чоҥаш полша.
– Тиде программе почеш автомобиль корно-влак, у микрорайонлаште инженер коммуникаций ышталтыт. Тидыже илышым эшеат саемдаш йӧным пуа, – ойлен Ирек Файзуллин.
Марий Эл вуйлатыше Юрий Зайцевын каласкалымыж почеш, «Стимул» программе дене келшышын 2024 ийыште республикыште икмыняр корно, коммунал да турист инфраструктур объектым чоҥаш палемдалтеш. Тудын мутшо почеш, тиде программе кажне субъектын социально-экономически вияҥмаштыже кугу рольым модеш да Марий Элланат тушко ушнымо моткоч кӱлешан. Молан манаш гын тидыже у микрорайонлаште корным да инженер сетьлам чоҥаш федеральный бюджет гыч ешартыш оксам налаш йӧным пуа.
Тиде вашлиймаште Ирек Файзуллин ден Юрий Зайцев ончыкыжым «Стимул» программыш пурташ темлыме икмыняр у объект шотышто мутланеныт.
Марий Эл Республикым вуйлатышын организаций да аналитике виктемжын уверже негызеш Л.Камалетдинова ямдылен
