Марий Элым вуйлатыше Юрий Зайцев 3 октябрьыште шоҥгыеҥ ден инвалид-влакын «Сосновая роща» интернат-пӧртышкышт миен коштын. Туштыжо кызыт «Демографий» национальный проектын «Кугурак тукым» федеральный проектым шуктен толмо кышкарыште пужен уэмдыме паша шукталтеш.
Тушто лиймыж годым регионым вуйлатыше интернат-пӧртын ончыл велжым, фойем да илыме пӧлем-влакым олмыктымо паша дене палыме лийын. Интернат-пӧрт 1977 ийыште чоҥалтын, тудо 150 еҥлан илаш келыштаралтын, персоналын чотшо – 68 еҥ.
Кызыт тушто олмыкттен уэмдыме паша виян кая. План почеш объектым 2024 ий ноябрьыште сдатлышаш улыт, но подрядный организаций чыла пашам шошылан мучашке шукташ сӧра.
Юрий Зайцев интернат-пӧртыштӧ шуктымо пашам кӱкшын аклен.
Интернат-пӧртыштӧ илыше ӱдырамаш илалше еҥ-влак верч тыршен шогымылан, нунылан тӱткышым ойырымылан Юрий Зайцевлан тауштен ойлен, тудлан суапле пашаштыже сеҥымашым тыланен.
Республикым вуйлатыше тидын деч вара калыклан психолого-педагогический да социальный полышым пуымо «Доверие» республиканский рӱдерыште лийын. Тушто ветеран организаций-влакын еҥышт да илалше ийготан граждан-влакын активышт дене вашлийын.
Тудо шоҥгыеҥ-влакым Илалше еҥ-влакын эртыше кечышт дене саламлен, нунылан чыла порым тыланен.
«Мый Илалше еҥ-влакын кечыштым пеш чын пайремлан шотлем. Илалше еҥ – таде опытан да мудреч уш-акылан наставник, тугай айдеме, могайже дене мутлананаш оҥай, могайже ой-каҥашым пуэн кертеш. Мый кугырак ийготан еҥ-влакым пеш чот пагалем. Ме нунылан социальный шот денат, окса денат полшышаш, пагалышаш да нунын верч тыршен шогышаш улына»,– каласен Марий Элым вуйлатыше.
Илалше еҥ-влакын тазалыкыштым саемдышашлан республикыште гериатрический службым ыштыме. Социальный сферыште илалше еҥ ден инвалид-влакым кужу жап ончымо системе ышталтеш, прокат пункт-влак реабилитаций шотышто у деч у технический средстве-влак дене пойдаралтыт.
Шушаш ийыште «Кичиер» санаторийыште каныше ветеран-влакын чотыштым кугемдаш, «Марий кужу ӱмыр» проектым шукташ тӱҥалаш палемдалтеш.
«Семья года 2023» Всероссийский конкурсышто «Шӧртньӧ еш» номинацийыште сеҥышыш лекше Ольга Майкова полшымылан да нунын ешым ты конкурсыш колтымылан республикын правительствыжлан таум каласен.
Мер организаций-влакын вуйлатышышт регионым вуйлатышылан икмыняр ойым пуэныт. Юрино районын почётан гражданинже Вера Клюквина шушаш ийыште Илалше еҥ-влакын кечышт вашеш Шереметев замокышто балым эртараш темлен. Юрий Зайцев темлыме ойым сайлан шотлен.
Финанс пашаеҥ-влаклан наградым кучыктен
3 октябрьыше Юрий Зайцев республикысе финанс орган-влакын пашаеҥышт дене вашлийын. Тыгодым финанс орган-влакын ветераныштым те профессиональный корныш кызыт гына шогалше самырык-влаклан пример улыда манын аклен.
Таче ме «Ветеран финансовых органов Российской Федерации» оҥеш пижыктыме знакым Марий Эл Республикысе финанс орган-влакын историйыштышт икымше гана кучыктена. Тудын дене илышыштын утларак ужашыжым республикысе финанс органлаште ыштыме пашалан пӧлеклыше еҥ-влак палемдалтыныт, каласен Юрий Зайцев.
Марий Элым вуйлатыше финанс орган-влакын сайын пашам ыштымыштым палемден.
Условий куштылго лийын огыл гынат, финанс орган-влакын пашаеҥышт сай лектышыш шуыныт: кодшо ийын итогшо почеш бюджетын доходшо 17,9 процентлан кушкын. Налог да налог огыл доход пурымо шотышто Марий Эл 2022 ийыште Юл кундем федеральный округышто 14 субъект коклаште нылымше верыш лектын, каласен Юрий Зайцев.
Республикым вуйлатыше финанс орган-влакын пашаеҥышт ден ветераныштлан тале профессионал улмыштлан да тыршен пашам ыштымыштлан тауштен да «Ветеран финансовых органов Российской Федерации» оҥеш пижыктыме знакым Еликанида Бастраковалан, Людмила Вершининалан, Любовь Игумновалан, Татьяна Овсянниковалан, Ольга Оносовалан, Алевтина Таныгиналан да Марина Шпилевскаялан кучыктен.
Марий Эл Республикым вуйлатышын администрацийжын информаций паша пӧлкажын уверже негызеш П.Шакиров ямдылен
