2023 ийыште Марий Элыште республиканский адресный инвестиционный программе дене 50 утла социально кӱлешан объектым чоҥымо да шотыш кондымо.
7 февральыште регионын правительствыштыже республиканский адресный инвестиционный программын 2023 ийыште шуктымо пашажым иктешленыт да 2024-2025 ий-влакан планым палемденыт.
«Российын президентше Владимир Путин палемден, инфраструктурын вияҥмыже экономикын пеҥгыдеммыже да калыкын илыш качествыж дене чак кылдалтын. Программын мероприятийже-влак экономикым вияҥдымашке, инфраструктурым саемдымашке, социально кӱлешан объект-шамычлан полшымашке да калыкын илыш качествыжым нӧлтымашке виктаралтыныт», – совещанийым вӱдымыж годым манын регионым вуйлатыше Юрий Зайцев.
Промышленность, экономически вияҥмаш да торговльо министр Станислав Крыловын увертарымыж почеш, 2023 ийыште республиканский адресный инвестиционный программыш 58 объектым пуртымо, тидлан чылаже 5,3 миллиард теҥгем кучылтмо.
Программын ик эн ончыч шуктышаш направленийже-влак коклаште республикысе калыклан чапле илыме вер ден илыме-коммунал озанлык услугым ситарыме, здравоохраненийым, образованийым да культурым, спорт ден туризмым, транспорт комплексым вияҥдыме направлений-влак улыт.
Программын кышкарыштыже Кокшайск ден Силикатный посёлкылаште врачебный амбулаторий-влакым, Тат-Китне ялыште фельдшер-акушер пунктым, Юрино районысо больницын поликлиникыжым чоҥен шуктымо.
Йошкар-Олаште, Звенигово, Килемар, Марий Турек, У Торъял да Параньга районлаште вӱдым ситарыме да йоктарен колтымо 17 объектыште чоҥымо да монтаж пашам ыштыме.
Туризм аланыште Козмодемьянск олаште пассажир причалым чоҥен шуктымо.
Медведево посёлкышто Сеҥымашлан 75 ий темме лӱмеш бульварым почмо. Тылеч посна Медведево посёлко ден Йошкар-Ола коклаште чоҥалтше рекреационный зонын I йыжыҥжым мучашлыме.
Эртыше ийын тыгак Перинатальный рӱдерлан, Калык-влакын келшымаш пӧртыштлан, Медведево районысо Азаново селан стадионжылан тӱрлӧ оборудованийым налме.
Олимпийский резерв училищым уэмден олмыктымо, Волжск олаште школым да Медведево районысо рӱдӧ больницын кугыеҥ-влаклан поликлиникыжым чоҥымо шотышто проект пашам ыштен шуктымо.
2024 ийыште программын кышкарыштыже 25 инфраструктур проектым илышыш пурташ да тидлан 6,2 миллиард теҥгем кучылташ палемдыме.
Йошкар-Олаште да Медведево районысо Руэм посёлкышто кок школым, Йошкар-Ола аэропортын пассажир терминалжым, муниципальный образований-шамычын вӱдым ситарыме да йоктаен колтымо объектлаштым чоҥен шуктат.
Марий Эл Республикым вуйлатышын пресс-службыжын уверже негызеш М.ИВАНОВА ямдылен
