Марий Эл Правительстве Председательын алмаштышыже С.Воронцов СВО эртыме кундемыш черетан гуманитар грузын миен шумыж ден у регионлаште илыше-влаклан полышым пуымо нерген Марий Эл вуйлатыше Ю.Зайцевлан ойлен.
Степан Воронцов полышым погымаште ура чонан еҥ, предприятий, мер ден волонтёр толкын-влак участвоватлат манын каласен. «Марий Эл верч» поро кумылым ончыктышо фонд боец-влаклан военно-шефский полышым командир-влак деч йодмашым поген чумыра. Каласыман, командир-шамыч шкештак фондыш але Марий Эл вуйлатыше Ю.Зайцев деке мият. Тыгак военнослужащий-шамычын авашт ден пелашыштын йодмыштат шотыш налалтеш.
Февральысе полышышто 7 автомобиль, автозапчасть, инструмент, чоҥымо материал, масксеть, блиндажысе сорта, спецоборудований, шокшо вургем лийыныт. Ты гана родо-тукым деч посылкымат намиеныт.
А у регионлаште илыше-влаклан канцеляр сату ден йоча модышым колтеныт.
Марий Эл вуйлатыше Ю.Зайцев гуманитар грузым чумырымаш да колтымаш ик жапланат ок шогал манын палемден. Тылеч посна Юрий Викторович боец-влаклан военно-шефский полышым погымаште да намиен кодымаште тыршыше ура чонан еҥ-шамычлан тауштен.
Марий Эл вуйлатышын пресс-службыжын уверже негызеш Л.Шабдарова ямдылен
