|
Ик тичмаш казна тöнеж лиеш
06.05.2020
Марий Элыште кугыжаныш собственность объектлам чоҥымо
шотышто ик тичмаш (единый) заказчик службо лиеш. Тиде пашам
«Капитально чоҥымаш виктем (управлений)» кугыжаныш казна тӧнеж (учреждений)
шукташ тӱҥалеш.
Кызытсе марте заказчик пашам республик кучемын органже-влак шуктеныт, а чоҥымашым виктарыме сомылым – Чоҥымаш, архитектур да илыме вер ден коммунал озанлык министерстве. Тыге тидлан кок велым мутым кучаш логалын. А тидым ик заказчик ышташ тӱҥалеш гын, роскот иземеш да подрядчикым ойырымо, нунын пашаштым да бюджет окса кузе кучылталтмым тергыме пеҥгыдемыт. Капитально чоҥымаш виктем «Марийскгражданпроект» АО-н Сеҥымаш бульварысе зданийыштыже верлана. Регион вуйлатыше Александр Евстифеев паша кабинетлам ончен, мыняр еҥ ыштышашым рашемден да тӧнеж ончылно могай задаче шогымо нерген палемден. «Тенийлан капитально чоҥымо 38 объект лийшаш. Нунын шотышто паша раш: проектироватлаш техзаданий рашемдалтеш, проектым ышташ да чоҥаш конкурс увертаралтеш, объектлам чоҥымо да кугыжаныш собственностьыш пуымо эскералтеш. Чыла специалист ик верыште лиеш да кажныже шке пашажым шукта, тудлан мутым куча. Сандене тыгай тӧнеж кӱлеш», - каласен Александр Евстифеев. Тыгай службым ыштыме йодыш правительствын заседанийыштыже каҥашалтын. Палемдыме, 2019 ий тӱҥалтыш гыч республикыште 53 регионал проект илышыш пурталтеш. Соглашений дене келшышын, тений социально кӱлешан 40 объектыште паша шукталтеш. |
Ик тичмаш казна тöнеж лиеш
